charagh-e-nur thame dasht se jugnu nikal aae

charāġh-e-nūr thāme dasht se jugnū nikal aa.e

palaT kar dekh leñ shāyad koī pahlū nikal aa.e

tumhāre hijr meñ pathrā ga.ī hai aañkh sāvan kī

milo ham se ki yuuñ shāyad koī aañsū nikal aa.e

hama-tan raqs rahtā huuñ yahī maiñ soch ke shāyad

tamannā-soz sahrā se koī aahū nikal aa.e

ye kū-e-yār hai koī karishma ho bhī saktā hai

agar is habs meñ us samt se ḳhushbū nikal aa.e

jakaḌ rakhā hai puure zor se kis ne shikanje meñ

mujhe lagtā hai terī yaad ke baazū nikal aa.e

anā.eñ tark karne kā safī' bas ek rasta hai

idhar se maiñ agar niklūñ udhar se tū nikal aa.e

charagh-e-nur thame dasht se jugnu nikal aae

palaT kar dekh len shayad koi pahlu nikal aae

tumhaare hijr mein pathra gai hai aankh sawan ki

milo hum se ki yun shayad koi aansu nikal aae

hama-tan raqs rahta hun yahi main soch ke shayad

tamanna-soz sahra se koi aahu nikal aae

ye ku-e-yar hai koi karishma ho bhi sakta hai

agar is habs mein us samt se KHushbu nikal aae

jakaD rakha hai pure zor se kis ne shikanje mein

mujhe lagta hai teri yaad ke bazu nikal aae

anaen tark karne ka safi' bas ek rasta hai

idhar se main agar niklun udhar se tu nikal aae