charagh-e-sahari hun lekin abhi bujha bhi nahin

charāġh-e-saharī huuñ lekin abhī bujhā bhī nahīñ

ye kaise kah duuñ ki atrāf meñ havā bhī nahīñ

ye aur baat ki milne meñ ehtiyāt kare

ajiib shaḳhs hai zāhir meñ vo ḳhafā bhī nahīñ

zabāñ meñ chāshnī paa.ī hai aisī zālim ne

vo saḳht baat bhī kah de lage burā bhī nahīñ

vo milne ko to hamesha hī mujh se miltā hai

ġhurūr-e-husn to dekho ki boltā bhī nahīñ

shab-e-firāq guzārūñ maiñ kis tarah apnī

falak pe chāñd sitāroñ kā qāfila bhī nahīñ

jhiñjhoḌtā hai mujhe rāt-din zamīr mirā

mire gunāh kī duniyā meñ kyā sazā bhī nahīñ

maiñ jāntā huuñ ki lahreñ mujhe Dubo deñgī

sivā.e is ke koī aur aasrā bhī nahīñ

har ek shaḳhs ko aisā kahāñ salīqa milā

vo baat kartā hai aisī ki kuchh kahā bhī nahīñ

maiñ chal rahā huuñ 'sa.īd' aise rāste pe jahāñ

sivā.e dhuup ke sar par kahīñ ghaTā bhī nahīñ

charagh-e-sahari hun lekin abhi bujha bhi nahin

ye kaise kah dun ki atraf mein hawa bhi nahin

ye aur baat ki milne mein ehtiyat kare

ajib shaKHs hai zahir mein wo KHafa bhi nahin

zaban mein chashni pai hai aisi zalim ne

wo saKHt baat bhi kah de lage bura bhi nahin

wo milne ko to hamesha hi mujh se milta hai

ghurur-e-husn to dekho ki bolta bhi nahin

shab-e-firaq guzarun main kis tarah apni

falak pe chand sitaron ka qafila bhi nahin

jhinjhoDta hai mujhe raat-din zamir mera

mere gunah ki duniya mein kya saza bhi nahin

main jaanta hun ki lahren mujhe Dubo dengi

siwae is ke koi aur aasra bhi nahin

har ek shaKHs ko aisa kahan saliqa mila

wo baat karta hai aisi ki kuchh kaha bhi nahin

main chal raha hun 'said' aise raste pe jahan

siwae dhup ke sar par kahin ghaTa bhi nahin