charagh-e-sham jo raushan hua haweli mein

charāġh-e-shām jo raushan huā havelī meñ

kisī kī yaad kā daftar khulā havelī meñ

usī kā chehra mujhe har taraf dikhā.ī diyā

vo jis kī guuñj rahī thī sadā havelī meñ

na tū na yaad tirī thī to itne barsoñ tak

kise maiñ DhūñDhtā phirtā rahā havelī meñ

ka.ī dinoñ se to dīvār-o-dar bhī haiñ ḳhāmosh

kisī kā jaise koī mar gayā havelī meñ

'ajīb baat hai buniyād rakhne vāloñ ko

yahāñ koī bhī nahīñ jāntā havelī meñ

mire buzurgoñ ne hijrat ke vaqt dekhā thā

vo ek ḳhvāb kahīñ kho gayā havelī meñ

pahāḌ hausle vāloñ kā dam bhī ghuTtā thā

magar ye dekh maiñ tanhā jiyā havelī meñ

idhar udhar ke sabhī log so.e āḳhir-kār

guzishta 'ahd magar jaag uThā havelī meñ

kisī kā 'aks hai yā koī ḳhvāb utrā hai

'zahūr' hone lagā hai ye kyā havelī meñ

charagh-e-sham jo raushan hua haweli mein

kisi ki yaad ka daftar khula haweli mein

usi ka chehra mujhe har taraf dikhai diya

wo jis ki gunj rahi thi sada haweli mein

na tu na yaad teri thi to itne barson tak

kise main DhunDhta phirta raha haweli mein

kai dinon se to diwar-o-dar bhi hain KHamosh

kisi ka jaise koi mar gaya haweli mein

'ajib baat hai buniyaad rakhne walon ko

yahan koi bhi nahin jaanta haweli mein

mere buzurgon ne hijrat ke waqt dekha tha

wo ek KHwab kahin kho gaya haweli mein

pahaD hausle walon ka dam bhi ghuTta tha

magar ye dekh main tanha jiya haweli mein

idhar udhar ke sabhi log soe aaKHir-kar

guzishta 'ahd magar jag uTha haweli mein

kisi ka 'aks hai ya koi KHwab utra hai

'zahur' hone laga hai ye kya haweli mein