charagh-e-zist ke donon sire jalao mat

charāġh-e-zīst ke donoñ sire jalāo mat

agar jalāo to lau is qadar baḌhāo mat

is aarzū meñ ki zinda uThā liye jaao

ḳhud apne dosh pe apnī salīb uThāo mat

sulag rahā hai jo dil vo bhaḌak bhī saktā hai

qarīb aao par itne qarīb aao mat

jo zaḳhm khaa.e haiñ un ko sadā aziiz rakho

jo tum ko bhuul gayā ho use bhulāo mat

jahāñ meñ koī to ho e.atibār ke qābil

vafā-e-dost ko ab aur āzmāo mat

isī tarah se milī hai har ik ko dād-e-hunar

jo sañg aa.e use chuum lo gañvāo mat

charagh-e-zist ke donon sire jalao mat

agar jalao to lau is qadar baDhao mat

is aarzu mein ki zinda uTha liye jao

KHud apne dosh pe apni salib uThao mat

sulag raha hai jo dil wo bhaDak bhi sakta hai

qarib aao par itne qarib aao mat

jo zaKHm khae hain un ko sada aziz rakho

jo tum ko bhul gaya ho use bhulao mat

jahan mein koi to ho eatibar ke qabil

wafa-e-dost ko ab aur aazmao mat

isi tarah se mili hai har ek ko dad-e-hunar

jo sang aae use chum lo ganwao mat