charagh-e-zist maddham hai abhi tu nam na kar aankhen

charāġh-e-zīst maddham hai abhī tū nam na kar āñkheñ

abhī ummīd meñ dam hai abhī tū nam na kar āñkheñ

kabhī to vasl kī chāragarī bhī kaam aa.egī

abhī to hijr marham hai abhī tū nam na kar āñkheñ

abhī to sāmne baiThī huuñ bilkul sāmne tere

abhī kis baat kā ġham hai abhī tū nam na kar āñkheñ

abhī jo fikr hai terī use sābit to hone de

abhī yāroñ meñ dam-ḳham hai abhī tū nam na kar āñkheñ

sarāboñ se abhī ummīd ke jharne nahīñ phūTe

ajab tishna sā aalam hai abhī tū nam na kar āñkheñ

bahāreñ hoñ na hoñ phir bhī chaman ḳhālī nahīñ rahtā

ye mausam ġham kā mausam hai abhī tū nam na kar āñkheñ

abhī manzar badalte hī badal jā.eñge sab chehre

bichhaḌte vaqt kā ġham hai abhī tū nam na kar āñkheñ

abhī ai bulbulo gaao na naġhme tum bahāroñ ke

abhī to lutf-e-paiham hai abhī tū nam na kar āñkheñ

charagh-e-zist maddham hai abhi tu nam na kar aankhen

abhi ummid mein dam hai abhi tu nam na kar aankhen

kabhi to wasl ki chaaragari bhi kaam aaegi

abhi to hijr marham hai abhi tu nam na kar aankhen

abhi to samne baiThi hun bilkul samne tere

abhi kis baat ka gham hai abhi tu nam na kar aankhen

abhi jo fikr hai teri use sabit to hone de

abhi yaron mein dam-KHam hai abhi tu nam na kar aankhen

sarabon se abhi ummid ke jharne nahin phuTe

ajab tishna sa aalam hai abhi tu nam na kar aankhen

bahaaren hon na hon phir bhi chaman KHali nahin rahta

ye mausam gham ka mausam hai abhi tu nam na kar aankhen

abhi manzar badalte hi badal jaenge sab chehre

bichhaDte waqt ka gham hai abhi tu nam na kar aankhen

abhi ai bulbulo gao na naghme tum bahaaron ke

abhi to lutf-e-paiham hai abhi tu nam na kar aankhen