charagh-e-zist sar-e-rahguzar hai kitni der

charāġh-e-zīst sar-e-rahguzar hai kitnī der

ye raushnī bhī sharīk-e-safar hai kitnī der

farār dard se ġham se mafar hai kitnī der

fasīl-e-shab ye charāġh-e-sahar hai kitnī der

savād-e-shām meñ ā.īne kahte jaate haiñ

tirā ye fan bhī ai ā.īna-gar hai kitnī der

zamīñ pukār rahī hai ai barg-e-ḳhushk tujhe

havā ke raqs meñ tū hai magar hai kitnī der

ragoñ meñ mauj-e-harārat nazar meñ barq kī rau

darūn-e-jism lahū kā bhañvar hai kitnī der

hameñ to shab ke samundar meñ ġharq rahnā hai

jamāl-e-sub.h-e-tarab mo'atabar hai kitnī der

ramīda vaqt ke manzar badalte rahte haiñ

havā kā qahr bhī sūkhe shajar hai kitnī der

mirī hayāt bhī mujh se bichhaḌne vaalī

tirā vajūd bhī pesh-e-nazar hai kitnī der

kisī bhī moḌ pe mujh se judā to honā hai

mirā junūn mirā ham-safar hai kitnī der

charagh-e-zist sar-e-rahguzar hai kitni der

ye raushni bhi sharik-e-safar hai kitni der

farar dard se gham se mafar hai kitni der

fasil-e-shab ye charagh-e-sahar hai kitni der

sawad-e-sham mein aaine kahte jate hain

tera ye fan bhi ai aaina-gar hai kitni der

zamin pukar rahi hai ai barg-e-KHushk tujhe

hawa ke raqs mein tu hai magar hai kitni der

ragon mein mauj-e-hararat nazar mein barq ki rau

darun-e-jism lahu ka bhanwar hai kitni der

hamein to shab ke samundar mein gharq rahna hai

jamal-e-subh-e-tarab mo'atabar hai kitni der

ramida waqt ke manzar badalte rahte hain

hawa ka qahr bhi sukhe shajar hai kitni der

meri hayat bhi mujh se bichhaDne wali

tera wajud bhi pesh-e-nazar hai kitni der

kisi bhi moD pe mujh se juda to hona hai

mera junun mera ham-safar hai kitni der