charag gul the zamin ki gardish Thahar rahi thi

charāg gul the zamīñ kī gardish Thahar rahī thī

maiñ tere hamrāh bāġh-e-jāñ se guzar rahī thī

tulūa ho kar tirī jabīñ ne kahā ki aao

maiñ paañv rakhte hue sitāroñ pe Dar rahī thī

tumhāre baazū pe sabz ta.avīz khil rahā thā

mirī mohabbat pe āyat-e-dil utar rahī thī

kise ḳhabar thī ye ehtimām-e-visāl-e-nau hai

maiñ hijr kī shab shikastagī meñ sañvar rahī thī

ki raushnī kā rasīlā ras the tamām manzar

maiñ apnī āñkheñ tumhārī āñkhoñ se bhar rahī thī

abhī abhī to dhanak ke nam ne chhuā thā mujh ko

abhī abhī to maiñ niiñd meñ baat kar rahī thī

vo ishq kā āḳhirī paḌāv vo dil kā thaknā

maiñ hijr-zādī thī aur ḳhud se guzar rahī thī

charag gul the zamin ki gardish Thahar rahi thi

main tere hamrah bagh-e-jaan se guzar rahi thi

tulua ho kar teri jabin ne kaha ki aao

main panw rakhte hue sitaron pe Dar rahi thi

tumhaare bazu pe sabz tawiz khil raha tha

meri mohabbat pe aayat-e-dil utar rahi thi

kise KHabar thi ye ehtimam-e-visal-e-nau hai

main hijr ki shab shikastagi mein sanwar rahi thi

ki raushni ka rasila ras the tamam manzar

main apni aankhen tumhaari aankhon se bhar rahi thi

abhi abhi to dhanak ke nam ne chhua tha mujh ko

abhi abhi to main nind mein baat kar rahi thi

wo ishq ka aaKHiri paDaw wo dil ka thakna

main hijr-zadi thi aur KHud se guzar rahi thi