charagh ka qad baDhane walon ki KHair ya rab

charāġh kā qad baḌhāne vāloñ kī ḳhair yā rab

havā ko dushman banāne vāloñ kī ḳhair yā rab

musāfiroñ ko jo dhuup meñ chhāñv de rahe haiñ

ye peḌ-paude lagāne vāloñ kī ḳhair yā rab

ham is se pahle to sirf nafrat ko jānte the

hameñ mohabbat sikhāne vāloñ kī ḳhair yā rab

maiñ Dar rahā huuñ ki bhaav roTī kā baḌh gayā hai

ye zahr sastā hai khāne vāloñ kī ḳhair yā rab

ye ḳhud hī mujh ko bulandiyoñ par biThā rahe haiñ

ki mujh ko nīchā dikhāne vāloñ kī ḳhair yā rab

maiñ sadqe jā.ūñ ki kitnī shīrīñ zabāñ hai urdu

charāġh-e-urdu jalāne vāloñ kī ḳhair yā rab

ham aise shā.ir unhīñ ke dam par uchhal rahe haiñ

suḳhan kī bazmeñ sajāne vāloñ kī ḳhair yā rab

charagh ka qad baDhane walon ki KHair ya rab

hawa ko dushman banane walon ki KHair ya rab

musafiron ko jo dhup mein chhanw de rahe hain

ye peD-paude lagane walon ki KHair ya rab

hum is se pahle to sirf nafrat ko jaante the

hamein mohabbat sikhane walon ki KHair ya rab

main Dar raha hun ki bhaw roTi ka baDh gaya hai

ye zahr sasta hai khane walon ki KHair ya rab

ye KHud hi mujh ko bulandiyon par biTha rahe hain

ki mujh ko nicha dikhane walon ki KHair ya rab

main sadqe jaun ki kitni shirin zaban hai urdu

charagh-e-urdu jalane walon ki KHair ya rab

hum aise shair unhin ke dam par uchhal rahe hain

suKHan ki bazmen sajaane walon ki KHair ya rab