chashm-e-bina ki zarurat hai parakhne ke liye

chashm-e-bīnā kī zarūrat hai parakhne ke liye

umr darkār hai insāñ ko samajhne ke liye

kaash ho jaa.e guzar bād-e-sabā kā un tak

vo jo kaliyāñ haiñ chaman meñ abhī khilne ke liye

jaan qurbān to parvāne ne kar dī lekin

rah ga.ī sham.a magar raat meñ jalne ke liye

dekh lo saaf nahīñ hai abhī matl.a shāyad

hai abhī aur ghaTā koī barasne ke liye

hausla jaise bhī chāheñ vo nikāleñ apnā

ye jo do-chār abhī naag haiñ Dasne ke liye

aap dīvāna samajhte haiñ to samjheñ lekin

maiñ to ḳhud Thokareñ khātā huuñ sañbhalne ke liye

jaane kab tak tumheñ is dahr meñ ronā hogā

aur hañs lo abhī kuchh vaqt hai hañsne ke liye

koī qātil koī zālim koī hāsid hai yahāñ

kis se āmāda rahūñ 'fauq' maiñ laḌne ke liye

chashm-e-bina ki zarurat hai parakhne ke liye

umr darkar hai insan ko samajhne ke liye

kash ho jae guzar baad-e-saba ka un tak

wo jo kaliyan hain chaman mein abhi khilne ke liye

jaan qurban to parwane ne kar di lekin

rah gai shama magar raat mein jalne ke liye

dekh lo saf nahin hai abhi matla shayad

hai abhi aur ghaTa koi barasne ke liye

hausla jaise bhi chahen wo nikalen apna

ye jo do-chaar abhi nag hain Dasne ke liye

aap diwana samajhte hain to samjhen lekin

main to KHud Thokaren khata hun sanbhalne ke liye

jaane kab tak tumhein is dahr mein rona hoga

aur hans lo abhi kuchh waqt hai hansne ke liye

koi qatil koi zalim koi hasid hai yahan

kis se aamada rahun 'fauq' main laDne ke liye