chashm-e-hairan ko yun hi mahw-e-nazar chhoD gae

chashm-e-hairāñ ko yuuñ hī mahv-e-nazar chhoḌ ga.e

dil meñ lahrā.e ḳhayāloñ meñ sharar chhoḌ ga.e

jin ke saa.e meñ kabhī baiTh ke sustāyā thā

vo ghane peḌ mirī rāh-guzar chhoḌ ga.e

muntazir un ke liye hai kisī girdāb kī aañkh

ḳhud safīnoñ ko jo hañgām-e-ḳhatar chhoḌ ga.e

qāfile nuur ke utre na kisī manzil par

shab ke nam-dīda kināroñ pe sahar chhoḌ ga.e

ḳhīrgī hai ki utartī hī nahīñ āñkhoñ se

kin añdheroñ meñ hameñ shams-o-qamar chhoḌ ga.e

le ga.e log jabīnoñ meñ ibādat kā ġhurūr

kitne sajdoñ ko magar ḳhāk-basar chhoḌ ga.e

aa.e āñkhoñ meñ na dam bhar ko sulagte aañsū

parda-e-chashm pe ik naqsh magar chhoḌ ga.e

raat ke aks jo shabnam meñ utarne aa.e

kitne phūloñ meñ 'samad' dāġh-e-jigar chhoḌ ga.e

chashm-e-hairan ko yun hi mahw-e-nazar chhoD gae

dil mein lahrae KHayalon mein sharar chhoD gae

jin ke sae mein kabhi baiTh ke sustaya tha

wo ghane peD meri rah-guzar chhoD gae

muntazir un ke liye hai kisi girdab ki aankh

KHud safinon ko jo hangam-e-KHatar chhoD gae

qafile nur ke utre na kisi manzil par

shab ke nam-dida kinaron pe sahar chhoD gae

KHirgi hai ki utarti hi nahin aankhon se

kin andheron mein hamein shams-o-qamar chhoD gae

le gae log jabinon mein ibaadat ka ghurur

kitne sajdon ko magar KHak-basar chhoD gae

aae aankhon mein na dam bhar ko sulagte aansu

parda-e-chashm pe ek naqsh magar chhoD gae

raat ke aks jo shabnam mein utarne aae

kitne phulon mein 'samad' dagh-e-jigar chhoD gae