chashm-e-junun mein husn-e-salasil hai be-qarar

chashm-e-junūñ meñ husn-e-salāsil hai be-qarār

kis kī galī meñ jashn-e-garebāñ manā.eñ ham

shāyad kisī kā haath baḌhe ban ke mudda.ī

ilzām kī talāsh meñ dāman sajā.eñ ham

rauzan banegā dīda-e-yāqūb ek din

apne liye ḳhud aap hī zindāñ banā.eñ ham

chhupne lagī hai ziist añdheroñ kī god meñ

aao to phir charāġh-e-havādis jalā.eñ ham

shahr-e-tarab meñ milte haiñ apne bhī naqsh-e-pā

aa.e na gar yaqīn to aao dikhā.eñ ham

jalve hī Das rahe haiñ shu.ūr-e-jamāl ko

kis ko hadīs-e-vādī-e-aiman sunā.eñ ham

dasht-e-talab ke ḳhaar bhī dil meñ chubhoiye

phir kaise lab pe harf-e-taqāzā na laa.eñ ham

uryāñ kiyā salīb ne ham ko bhī apne saath

sochā thā āsmān-e-chahārum pe jaa.eñ ham

phir garm ret uḌ ke chalī bastiyoñ kī samt

mahmil-nashīñ ko DhūñDh ke sahrā meñ laa.eñ ham

zahrāb ban chukā hai ye ehsās-e-āgahī

ab kis ko baḳht dard kā darmāñ banā.eñ ham

chashm-e-junun mein husn-e-salasil hai be-qarar

kis ki gali mein jashn-e-gareban manaen hum

shayad kisi ka hath baDhe ban ke muddai

ilzam ki talash mein daman sajaen hum

rauzan banega dida-e-yaqub ek din

apne liye KHud aap hi zindan banaen hum

chhupne lagi hai zist andheron ki god mein

aao to phir charagh-e-hawadis jalaen hum

shahr-e-tarab mein milte hain apne bhi naqsh-e-pa

aae na gar yaqin to aao dikhaen hum

jalwe hi Das rahe hain shuur-e-jamal ko

kis ko hadis-e-wadi-e-aiman sunaen hum

dasht-e-talab ke KHar bhi dil mein chubhoiye

phir kaise lab pe harf-e-taqaza na laen hum

uryan kiya salib ne hum ko bhi apne sath

socha tha aasman-e-chahaarum pe jaen hum

phir garm ret uD ke chali bastiyon ki samt

mahmil-nashin ko DhunDh ke sahra mein laen hum

zahrab ban chuka hai ye ehsas-e-agahi

ab kis ko baKHt dard ka darman banaen hum