chashm-e-nam kuchh bhi nahin aur sher-e-tar kuchh bhi nahin

chashm-e-nam kuchh bhī nahīñ aur sher-e-tar kuchh bhī nahīñ

ab yahāñ ḳhūn-e-jigar naqsh-e-hunar kuchh bhī nahīñ

hai sabhī kuchh mehrbāñ nā-mehrbāñ lafzoñ kā pher

zindagī meñ mo'tabar nā-mo'tabar kuchh bhī nahīñ

dil se dil ko raah kaisī hai ye husn-e-ittifāq

varna duniyā meñ mohabbat kā asar kuchh bhī nahīñ

jis hunar ko log samjheñge kabhī la.al-o-gohar

aaj ke bāzār meñ aisā hunar kuchh bhī nahīñ

ahl-e-īmāñ kā aqīda hai ḳhudā ke baab meñ

hai vahī sab kuchh jo tā-hadd-e-nazar kuchh bhī nahīñ

apne apne fā.ede kī jañg jaarī hai yahāñ

chashm-e-bīnā meñ nizām-e-ḳhair-o-shar kuchh bhī nahīñ

ai sukūt-e-lā-makāñ meñ baiThne vaale batā

kyā jahān-e-chār-sū kā shor-o-shar kuchh bhī nahīñ

har taraf se zulmatoñ kā ek sail-e-be-īmāñ

is jahāñ meñ hāsil-e-fikr-o-nazar kuchh bhī nahīñ

chashm-e-nam kuchh bhi nahin aur sher-e-tar kuchh bhi nahin

ab yahan KHun-e-jigar naqsh-e-hunar kuchh bhi nahin

hai sabhi kuchh mehrban na-mehrban lafzon ka pher

zindagi mein mo'tabar na-mo'tabar kuchh bhi nahin

dil se dil ko rah kaisi hai ye husn-e-ittifaq

warna duniya mein mohabbat ka asar kuchh bhi nahin

jis hunar ko log samjhenge kabhi lal-o-gohar

aaj ke bazar mein aisa hunar kuchh bhi nahin

ahl-e-iman ka aqida hai KHuda ke bab mein

hai wahi sab kuchh jo ta-hadd-e-nazar kuchh bhi nahin

apne apne faede ki jang jari hai yahan

chashm-e-bina mein nizam-e-KHair-o-shar kuchh bhi nahin

ai sukut-e-la-makan mein baiThne wale bata

kya jahan-e-chaar-su ka shor-o-shar kuchh bhi nahin

har taraf se zulmaton ka ek sail-e-be-iman

is jahan mein hasil-e-fikr-o-nazar kuchh bhi nahin