chashma kabhi naddi kabhi dariya mera dariya

chashma kabhī naddī kabhī dariyā mirā dariyā

chaltā rahā bahrūp badaltā mirā dariyā

bechain dar-e-hijr meñ har bahr kī bāñheñ

aur hasrat-e-pā-bosī-e-sahrā mirā dariyā

bahtā hai kisī manzar-e-nādīda kī dhun meñ

begāna-e-har-chashm-e-shanāsā mirā dariyā

har mauj hai ā.īna-e-girdāb shab-o-roz

har aks meñ rakhtā hai zamāna mirā dariyā

mujh par bhī huvaidā nahīñ hotī mirī ḳhvāhish

sairāb mirī mauj hai pyāsā mirā dariyā

naddī mire siine meñ machaltī tirī naddī

dariyā tirī āñkhoñ meñ chamaktā tirā dariyā

ḳhud asl-e-tamannā huuñ karūñ kis kī tamanna

mere hī samundar meñ giregā mirā dariyā

lagtā hai kahīñ aur bhī maiñ bahtā rahā huuñ

pahle bhī koī thī mirī duniyā mirā dariyā

naddī kī har-ik lahr ke lab par hai ye naġhma

dariyā mirā dariyā mirā dariyā mirā dariyā

har manzil-e-tahzīb hai taḳhrīb kī zad meñ

bahtā hai banātā huā rastā mirā dariyā

be-sabza-o-gul Thahrī mirī ḳhaak tan-e-ḳhvāb

merī hī zamīñ se nahīñ guzrā mirā dariyā

ai ḳhāk-e-zamīñ tū bhī hai zinda mire dam se

dil ban ke tire jism meñ dhaḌkā mirā dariyā

bādal kabhī bārish kabhī sho.ala tirī bāteñ

be-kal kabhī jal-thal kabhī jaltā mirā dariyā

kis kaam ke mere liye sadiyoñ ke samundar

ai ret kahāñ hai mirā lamha mirā dariyā

jaarī hai tahayyur ke kināroñ kā kaTāv

ab tak kahīñ jā kar nahīñ utrā mirā dariyā

ai kaash ki har lahr ko par lag ga.e hote

chhūtā tirī palkoñ kā sitārā mirā dariyā

sahrā hai usī pyaas se sairāb abhī tak

jis shaam lahū-rang huā thā mirā dariyā

'armān' maiñ ik zaḳhm-e-dil-e-mauja-e-jū huuñ

lekin hai yahī dard-e-tamannā mirā dariyā

chashma kabhi naddi kabhi dariya mera dariya

chalta raha bahrup badalta mera dariya

bechain dar-e-hijr mein har bahr ki banhen

aur hasrat-e-pa-bosi-e-sahra mera dariya

bahta hai kisi manzar-e-nadida ki dhun mein

begana-e-har-chashm-e-shanasa mera dariya

har mauj hai aaina-e-girdab shab-o-roz

har aks mein rakhta hai zamana mera dariya

mujh par bhi huwaida nahin hoti meri KHwahish

sairab meri mauj hai pyasa mera dariya

naddi mere sine mein machalti teri naddi

dariya teri aankhon mein chamakta tera dariya

KHud asl-e-tamanna hun karun kis ki tamanna

mere hi samundar mein girega mera dariya

lagta hai kahin aur bhi main bahta raha hun

pahle bhi koi thi meri duniya mera dariya

naddi ki har-ik lahr ke lab par hai ye naghma

dariya mera dariya mera dariya mera dariya

har manzil-e-tahzib hai taKHrib ki zad mein

bahta hai banata hua rasta mera dariya

be-sabza-o-gul Thahri meri KHak tan-e-KHwab

meri hi zamin se nahin guzra mera dariya

ai KHak-e-zamin tu bhi hai zinda mere dam se

dil ban ke tere jism mein dhaDka mera dariya

baadal kabhi barish kabhi shoala teri baaten

be-kal kabhi jal-thal kabhi jalta mera dariya

kis kaam ke mere liye sadiyon ke samundar

ai ret kahan hai mera lamha mera dariya

jari hai tahayyur ke kinaron ka kaTaw

ab tak kahin ja kar nahin utra mera dariya

ai kash ki har lahr ko par lag gae hote

chhuta teri palkon ka sitara mera dariya

sahra hai usi pyas se sairab abhi tak

jis sham lahu-rang hua tha mera dariya

'arman' main ek zaKHm-e-dil-e-mauja-e-ju hun

lekin hai yahi dard-e-tamanna mera dariya