chehra bata raha hai raaton ko jagte ho

chehra batā rahā hai rātoñ ko jāgte ho

kaisī thakan milī hai hañs kar utārte ho

kis ke qadam paḌe the kaise nishāñ paḌe haiñ

kis ke ġhamoñ kī miTTī āñgan se jhāḌte ho

likkho kabhī ki mujh ko tum yaad kar rahe ho

masrūfiyat ke lamhe bhī mujh pe vārte ho

chhoḌā thā tum ne jaisā Thahre hue haiñ ab tak

aur tum galī galī meñ ham ko pukārte ho

ruḳhsat karo nā hañs kar āñkhoñ se do duā.eñ

jaane pe mere aise kyoñ muñh bigāḌte ho

taare hue haiñ maddham chandā chalā gayā hai

yaañ raat ho chukī hai tum din guzārte ho

mausam huā hai barham bechain haiñ fazā.eñ

aise meñ tum 'diyā' kī zulfeñ sañvārte ho

chehra bata raha hai raaton ko jagte ho

kaisi thakan mili hai hans kar utarte ho

kis ke qadam paDe the kaise nishan paDe hain

kis ke ghamon ki miTTi aangan se jhaDte ho

likkho kabhi ki mujh ko tum yaad kar rahe ho

masrufiyat ke lamhe bhi mujh pe warte ho

chhoDa tha tum ne jaisa Thahre hue hain ab tak

aur tum gali gali mein hum ko pukarte ho

ruKHsat karo na hans kar aankhon se do duaen

jaane pe mere aise kyon munh bigaDte ho

tare hue hain maddham chanda chala gaya hai

yan raat ho chuki hai tum din guzarte ho

mausam hua hai barham bechain hain fazaen

aise mein tum 'diya' ki zulfen sanwarte ho