chehre ko mahtab to aankhon ko jhil likh

chehre ko māhtāb to āñkhoñ ko jhiil likh

jo qudratan jamīl hai us ko jamīl likh

da.avā ye chāhtā hai ki koī dalīl ho

lekin ḳhudā hai ek use be-dalīl likh

chehra ho māhtāb nazar nūr-e-yār ho

aisā mile jo koī to us ko shakīl likh

tanhā.iyoñ kā zahr badan meñ utar na jaa.e

milne kī apne koī ḳhudā-rā sabīl likh

har manzar-e-jamāl meñ san.at usī kī hai

jo ḳhāliq-e-jamāl hai us ko jamīl likh

āñkhoñ kā e.atibār bhī baaqī na rah sake

afsāna zindagī kā na itnā tavīl likh

'zākir' ravish ravish se zamāne kī hai ayaañ

honā paḌegā apnā hameñ ḳhud-kafīl likh

chehre ko mahtab to aankhon ko jhil likh

jo qudratan jamil hai us ko jamil likh

dawa ye chahta hai ki koi dalil ho

lekin KHuda hai ek use be-dalil likh

chehra ho mahtab nazar nur-e-yar ho

aisa mile jo koi to us ko shakil likh

tanhaiyon ka zahr badan mein utar na jae

milne ki apne koi KHuda-ra sabil likh

har manzar-e-jamal mein sanat usi ki hai

jo KHaliq-e-jamal hai us ko jamil likh

aankhon ka eatibar bhi baqi na rah sake

afsana zindagi ka na itna tawil likh

'zakir' rawish rawish se zamane ki hai ayan

hona paDega apna hamein KHud-kafil likh