chehre pe jo raunaq hai wo andar to nahin hai

chehre pe jo raunaq hai vo andar to nahīñ hai

jo yaar kā dil moh le vo jauhar to nahīñ hai

sad-shukr qanā.at kī mujhe mil ga.ī daulat

nādār huuñ rahzan kā mujhe Dar to nahīñ hai

sākin huuñ jahāñ shakk-o-hasad buġhz-o-tanāfur

rahne ko makāñ hai vo magar ghar to nahīñ hai

dastak diye jaatā hai koī ajnabī hogā

maujūd ho jo dil meñ vo bāhar to nahīñ hai

us kā vahī jalva hai vahī jalvagarī hai

haañ mujh ko hī tāb-e-ruḳh-e-anvar to nahīñ hai

kyoñ kartā hai vo hashr bapā ishq pe us se

māshūq hai vo dāvar-e-mahshar to nahīñ hai

chehre pe jo raunaq hai wo andar to nahin hai

jo yar ka dil moh le wo jauhar to nahin hai

sad-shukr qanaat ki mujhe mil gai daulat

nadar hun rahzan ka mujhe Dar to nahin hai

sakin hun jahan shakk-o-hasad bughz-o-tanafur

rahne ko makan hai wo magar ghar to nahin hai

dastak diye jata hai koi ajnabi hoga

maujud ho jo dil mein wo bahar to nahin hai

us ka wahi jalwa hai wahi jalwagari hai

han mujh ko hi tab-e-ruKH-e-anwar to nahin hai

kyon karta hai wo hashr bapa ishq pe us se

mashuq hai wo dawar-e-mahshar to nahin hai