chehre pe mere ab wo raunat nahin rahi

chehre pe mere ab vo ra.ūnat nahīñ rahī

ā.īna dekhne kī zarūrat nahīñ rahī

qaabū meñ phir hamārī ibādat nahīñ rahī

virse meñ jo milī thī imārat nahīñ rahī

sad shukr apne paañv pe chalne lagā huuñ maiñ

baisākhiyoñ kī mujh ko zarūrat nahīñ rahī

jīvan hai jaise dhuup meñ dīmak-zada kitāb

jis ke varaq ulaTne kī himmat nahīñ rahī

ilm-o-hunar sadāqat-o-mehr-o-vafā ḳhulūs

bāzār meñ kisī kī bhī qīmat nahīñ rahī

sotā huuñ āñkheñ muuñd ke bhīgī zamīn par

achchhā hai mere sar pe koī chhat nahīñ rahī

kāsa-ba-dast ghuum rahī haiñ sharāfateñ

ab un ko muñh chhupāne kī hājat nahīñ rahī

sach bolnā tapāk se milnā har ek se

jazbe ye vo haiñ jin meñ harārat nahīñ rahī

kaa.ī kī ik chaTān pe Thahrā huā huuñ maiñ

pairoñ ko ab phisalne kī aadat nahīñ rahī

chehre pe mere ab wo raunat nahin rahi

aaina dekhne ki zarurat nahin rahi

qabu mein phir hamari ibaadat nahin rahi

wirse mein jo mili thi imarat nahin rahi

sad shukr apne panw pe chalne laga hun main

baisakhiyon ki mujh ko zarurat nahin rahi

jiwan hai jaise dhup mein dimak-zada kitab

jis ke waraq ulaTne ki himmat nahin rahi

ilm-o-hunar sadaqat-o-mehr-o-wafa KHulus

bazar mein kisi ki bhi qimat nahin rahi

sota hun aankhen mund ke bhigi zamin par

achchha hai mere sar pe koi chhat nahin rahi

kasa-ba-dast ghum rahi hain sharafaten

ab un ko munh chhupane ki hajat nahin rahi

sach bolna tapak se milna har ek se

jazbe ye wo hain jin mein hararat nahin rahi

kai ki ek chaTan pe Thahra hua hun main

pairon ko ab phisalne ki aadat nahin rahi