chehre se numayan hai ek ek ada gham ki

chehre se numāyāñ hai ek ek adā ġham kī

insāñ jise kahte haiñ tasvīr hai mātam kī

kyoñ ham ko Darāte ho āshob-e-jahannum se

duniyā bhī to āḳhir hai ik shakl jahannum kī

majbūrī-o-māzūrī mahrūmī-o-nākāmī

āḳhir koī had bhī hai is silsila-e-ġham kī

har aan muqābil hai ye mahr-e-daraḳhshāñ ke

jur.at to koī dekhe ik qatra-e-shabnam kī

jannat se nikal kar phir jannat na milī us ko

kyā kyā abhī likkhā hai taqdīr meñ aadam kī

darkār hai getī ko phir taaza lahū shāyad

surḳhī yahī kahtī hai afsāna-e-ālam kī

girdāb meñ ai 'jauhar' ye kis kā safīna hai

maujoñ ke talātum meñ āvāz hai mātam kī

chehre se numayan hai ek ek ada gham ki

insan jise kahte hain taswir hai matam ki

kyon hum ko Daraate ho aashob-e-jahannum se

duniya bhi to aaKHir hai ek shakl jahannum ki

majburi-o-mazuri mahrumi-o-nakaami

aaKHir koi had bhi hai is silsila-e-gham ki

har aan muqabil hai ye mahr-e-daraKHshan ke

jurat to koi dekhe ek qatra-e-shabnam ki

jannat se nikal kar phir jannat na mili us ko

kya kya abhi likkha hai taqdir mein aadam ki

darkar hai geti ko phir taza lahu shayad

surKHi yahi kahti hai afsana-e-alam ki

girdab mein ai 'jauhar' ye kis ka safina hai

maujon ke talatum mein aawaz hai matam ki