chehron ko be-naqab samajhne laga tha main

chehroñ ko be-naqāb samajhne lagā thā maiñ

sab ko khulī kitāb samajhne lagā thā maiñ

jalnā hī chāhiye thā mujhe aur jal gayā

añgāroñ ko gulāb samajhne lagā thā maiñ

ye kyā huā ki niiñd hī āñkhoñ se uḌ ga.ī

kuchh kuchh zabān-e-ḳhvāb samajhne lagā thā maiñ

apnī hī raushnī se nazar khā ga.ī fareb

zarroñ ko āftāb samajhne lagā thā maiñ

phir kyuuñ sazā-e-tishna-labī dī ga.ī mujhe

paanī ko bhī sharāb samajhne lagā thā maiñ

buniyād apne ghar kī fazāoñ meñ Daal dī

bastī ko zer-e-āb samajhne lagā thā maiñ

mujh se hī ho ga.ī hai savāl-e-vafā kī bhuul

duniyā ko lā-javāb samajhne lagā thā maiñ

chehron ko be-naqab samajhne laga tha main

sab ko khuli kitab samajhne laga tha main

jalna hi chahiye tha mujhe aur jal gaya

angaron ko gulab samajhne laga tha main

ye kya hua ki nind hi aankhon se uD gai

kuchh kuchh zaban-e-KHwab samajhne laga tha main

apni hi raushni se nazar kha gai fareb

zarron ko aaftab samajhne laga tha main

phir kyun saza-e-tishna-labi di gai mujhe

pani ko bhi sharab samajhne laga tha main

buniyaad apne ghar ki fazaon mein Dal di

basti ko zer-e-ab samajhne laga tha main

mujh se hi ho gai hai sawal-e-wafa ki bhul

duniya ko la-jawab samajhne laga tha main