chehron pe KHamushi ki lau ruh se ham-kalam hain

chehroñ pe ḳhāmushī kī lau ruuh se ham-kalām haiñ

ya.anī jo ġharq-e-ishq haiñ un ko mire salām haiñ

ḳhalvat-e-dil tire liye ā.ūñgī jald lauT ke

milne ko aa.e mehmāñ ghar ke do chaar kaam haiñ

kaise haiñ mere aqrabā kaisī huuñ maiñ patā nahīñ

bāteñ haiñ ḳhud se raat din bhūle tamām naam haiñ

roz-e-azal se haiñ judā aql-o-junūñ ke rāste

ya.anī tire ḳhayāl meñ donoñ ke ek daam haiñ

ishq kī avvalīn shart hai kūcha-e-yār se nikal

hosh se be-niyāz ho bhuul jā sub.h-o-shām haiñ

kār-e-firāq-o-hijr to ujlat kā kaam hī nahīñ

lamhe tire ḳhayāl ke tujh se bhī tez-gām haiñ

chehron pe KHamushi ki lau ruh se ham-kalam hain

yani jo gharq-e-ishq hain un ko mere salam hain

KHalwat-e-dil tere liye aaungi jald lauT ke

milne ko aae mehman ghar ke do chaar kaam hain

kaise hain mere aqraba kaisi hun main pata nahin

baaten hain KHud se raat din bhule tamam nam hain

roz-e-azal se hain juda aql-o-junun ke raste

yani tere KHayal mein donon ke ek dam hain

ishq ki awwalin shart hai kucha-e-yar se nikal

hosh se be-niyaz ho bhul ja subh-o-sham hain

kar-e-firaq-o-hijr to ujlat ka kaam hi nahin

lamhe tere KHayal ke tujh se bhi tez-gam hain