chha gaya mere muqaddar pe andhera ai dost

chhā gayā mere muqaddar pe añdherā ai dost

tū ne shānoñ pe jo gesū ko bikherā ai dost

yuuñ shab-e-ġham meñ tirī yaad dabe paañv aa.ī

tīrgī se ho numū jaise saverā ai dost

maiñ to ḳhāmosh thā chup rah na sake zaḳhm ke lab

maiñ ne samjhā hai sadā tujh ko masīhā ai dost

ek shabnam hī jahāñ raat ga.e rotī hai

dil huā merā misāl-e-gul-e-sahrā ai dost

vo nishāñ ahl-e-ḳhirad kahte haiñ jis ko manzil

naqsh-e-pā se hai junūñ ke vo huvaidā ai dost

kashtī-e-zīst ko hāsil huī girdāb-e-amīq

bahr-e-ulfat meñ milā kis ko kinārā ai dost

tere gesū mirī uljhan ke ḳhatāvār nahīñ

tū ne un ko to ka.ī baar sañvārā ai dost

luT gayā ab to matā.a-e-ġham-e-tanhā.ī bhī

kis adā se tirī yādoñ ne pukārā ai dost

phir ye charchā hai vo ā.eñge sar-e-bazm 'vahīd'

chhuT na jaa.e kahīñ dāmān-e-shakebā ai dost

chha gaya mere muqaddar pe andhera ai dost

tu ne shanon pe jo gesu ko bikhera ai dost

yun shab-e-gham mein teri yaad dabe panw aai

tirgi se ho numu jaise sawera ai dost

main to KHamosh tha chup rah na sake zaKHm ke lab

main ne samjha hai sada tujh ko masiha ai dost

ek shabnam hi jahan raat gae roti hai

dil hua mera misal-e-gul-e-sahra ai dost

wo nishan ahl-e-KHirad kahte hain jis ko manzil

naqsh-e-pa se hai junun ke wo huwaida ai dost

kashti-e-zist ko hasil hui girdab-e-amiq

bahr-e-ulfat mein mila kis ko kinara ai dost

tere gesu meri uljhan ke KHatawar nahin

tu ne un ko to kai bar sanwara ai dost

luT gaya ab to mataa-e-gham-e-tanhai bhi

kis ada se teri yaadon ne pukara ai dost

phir ye charcha hai wo aaenge sar-e-bazm 'wahid'

chhuT na jae kahin daman-e-shakeba ai dost