chha gaya mustaqilan shab ka andhera shayad

chhā gayā mustaqilan shab kā añdherā shāyad

ab na hogā kabhī bastī meñ saverā shāyad

haañ abhī vaqt hai kuchh faiz uThā.e koī

phir na ho pā.egā us jogī kā pherā shāyad

naag be-ḳhauf-o-ḳhatar phirte haiñ kūcha kūcha

bastiyoñ meñ nahīñ ab koī saperā shāyad

mālik-e-kaun-o-makāñ kā jo karam hai sab par

us kī nazroñ meñ nahīñ terā ki merā shāyad

ḳhema-zan ranj-o-alam yuuñ haiñ mire siine meñ

zindagī bhar na uThā.eñge ye Derā shāyad

niiñd ko chhoḌ kar ab fikr-e-safar kar 'lāġhar'

kuuch karne ko hai ab terā bhī Derā shāyad

chha gaya mustaqilan shab ka andhera shayad

ab na hoga kabhi basti mein sawera shayad

han abhi waqt hai kuchh faiz uThae koi

phir na ho paega us jogi ka phera shayad

nag be-KHauf-o-KHatar phirte hain kucha kucha

bastiyon mein nahin ab koi sapera shayad

malik-e-kaun-o-makan ka jo karam hai sab par

us ki nazron mein nahin tera ki mera shayad

KHema-zan ranj-o-alam yun hain mere sine mein

zindagi bhar na uThaenge ye Dera shayad

nind ko chhoD kar ab fikr-e-safar kar 'laghar'

kuch karne ko hai ab tera bhi Dera shayad