chhai hai qayamat ki ghaTa dekhiye kya ho

chhā.ī hai qayāmat kī ghaTā dekhiye kyā ho

barse to barasne kī adā dekhiye kyā ho

khul khul ke sabhī phuul to masrūr haiñ lekin

masmūm hai gulshan kī fazā dekhiye kyā ho

phir josh meñ haiñ aaj mire madd-e-muqābil

hai merī vafā un kī jafā dekhiye kyā ho

sar joḌ ke baiThe haiñ sabhī sulh kī ḳhātir

haiñ un ke ḳhayālāt judā dekhiye kyā ho

tūfān havādis meñ jalāne to chalā huuñ

ik mehr-o-uḳhuvvat kā diyā dekhiye kyā hū

haq baat bhī arbāb-e-adālat ko khalī hai

iz.hār-e-haqīqat kī sazā dekhiye kyā ho

sahrā-e-tajassus meñ talāsh apnī hai 'kausar'

kuchh yaad nahiñ apnā patā dekhiye kyā ho

chhai hai qayamat ki ghaTa dekhiye kya ho

barse to barasne ki ada dekhiye kya ho

khul khul ke sabhi phul to masrur hain lekin

masmum hai gulshan ki faza dekhiye kya ho

phir josh mein hain aaj mere madd-e-muqabil

hai meri wafa un ki jafa dekhiye kya ho

sar joD ke baiThe hain sabhi sulh ki KHatir

hain un ke KHayalat juda dekhiye kya ho

tufan hawadis mein jalane to chala hun

ek mehr-o-uKHuwwat ka diya dekhiye kya hu

haq baat bhi arbab-e-adalat ko khali hai

izhaar-e-haqiqat ki saza dekhiye kya ho

sahra-e-tajassus mein talash apni hai 'kausar'

kuchh yaad nahin apna pata dekhiye kya ho