chhanw auron ke liye hai to samar auron ke

chhāñv auroñ ke liye hai to samar auroñ ke

kaam aate haiñ hamesha hī shajar auroñ ke

vo hai ā.īna use fikr ho kyuuñ kar apnī

vo batātā hai faqat aib-o-hunar auroñ ke

jañg maidān se kamroñ meñ simaT aa.ī hai

ghar na jaanā kabhī be-ḳhauf-o-ḳhatar auroñ ke

ahd-e-nau terī siyāsat kā karam hai ki yahāñ

jism apne haiñ magar jismoñ pe sar auroñ ke

baḳhshne vaale hameñ baḳhsh de apnī tāqat

ab na rahe pā.eñge ham dast-nigar auroñ ke

mujh ko apnoñ ne vo ta.abīreñ atā kī haiñ ki aaj

ḳhvāb palkoñ pe sajātā huuñ magar auroñ ke

ye bhī kyā baat ki har saañs ho ḳhud se mansūb

zindagī naam hī karnā hai to kar auroñ ke

chhanw auron ke liye hai to samar auron ke

kaam aate hain hamesha hi shajar auron ke

wo hai aaina use fikr ho kyun kar apni

wo batata hai faqat aib-o-hunar auron ke

jang maidan se kamron mein simaT aai hai

ghar na jaana kabhi be-KHauf-o-KHatar auron ke

ahd-e-nau teri siyasat ka karam hai ki yahan

jism apne hain magar jismon pe sar auron ke

baKHshne wale hamein baKHsh de apni taqat

ab na rahe paenge hum dast-nigar auron ke

mujh ko apnon ne wo tabiren ata ki hain ki aaj

KHwab palkon pe sajata hun magar auron ke

ye bhi kya baat ki har sans ho KHud se mansub

zindagi nam hi karna hai to kar auron ke