chhalak rahi hain jo aaj aankhen dukhon ka itna risaw kyon hai

chhalak rahī haiñ jo aaj āñkheñ dukhoñ kā itnā risāv kyoñ hai

maiñ apne ashkoñ se pūchhtā huuñ ġhamoñ ko mujh se lagāo kyoñ hai

maiñ apne logoñ ke aage aa kar akele duniyā se laḌ rahā thā

ye merā siina hai chhalnī lekin kamar pe gahre ye ghaav kyoñ hai

jo dil meñ aayā uThā dī uñglī mujhe hī mujrim banā ke maarā

sazā bhī mansūb kar chuke jab to pairvī kā dabāv kyoñ hai

hameñ pata hai ghane añdheroñ meñ ghir ga.ī haiñ hamārī rāheñ

agar ye sach hai hamāre dil meñ ye raushnī kā alaav kyoñ hai

rivāj-o-rasmoñ se gar laḌūñgā laḌegī mujh se tamām duniyā

maiñ ulTe dhāroñ meñ tairtā huuñ magar ye ulTā bahāv kyoñ hai

mirī hai lahreñ mire thapeḌe mire hai tūfāñ mire talātum

maiñ jab se niklā huuñ naav le kar bhañvar meñ merī ye naav kyoñ hai

parā.e apne sabhī haiñ shāmil mirī tabāhī ke vasvasoñ meñ

jab apne hī chaal chal rahe haiñ to apnoñ kā ye banāv kyoñ hai

tamām shakloñ ko apnī kah kar hazāroñ kirdār kar chukā huuñ

maiñ jis kahānī meñ jī rahā huuñ usī meñ itne ghumāv kyoñ hai

chhalak rahi hain jo aaj aankhen dukhon ka itna risaw kyon hai

main apne ashkon se puchhta hun ghamon ko mujh se lagao kyon hai

main apne logon ke aage aa kar akele duniya se laD raha tha

ye mera sina hai chhalni lekin kamar pe gahre ye ghaw kyon hai

jo dil mein aaya uTha di ungli mujhe hi mujrim bana ke mara

saza bhi mansub kar chuke jab to pairwi ka dabaw kyon hai

hamein pata hai ghane andheron mein ghir gai hain hamari rahen

agar ye sach hai hamare dil mein ye raushni ka alaw kyon hai

riwaj-o-rasmon se gar laDunga laDegi mujh se tamam duniya

main ulTe dhaaron mein tairta hun magar ye ulTa bahaw kyon hai

meri hai lahren mere thapeDe mere hai tufan mere talatum

main jab se nikla hun naw le kar bhanwar mein meri ye naw kyon hai

parae apne sabhi hain shamil meri tabahi ke waswason mein

jab apne hi chaal chal rahe hain to apnon ka ye banaw kyon hai

tamam shaklon ko apni kah kar hazaron kirdar kar chuka hun

main jis kahani mein ji raha hun usi mein itne ghumaw kyon hai