chhat Tapakti hai kisi dida-e-tar ki surat

chhat Tapaktī hai kisī dīda-e-tar kī sūrat

kaash dekhe koī aa kar mire ghar kī sūrat

yaas kī god meñ lipTā hai mirā qalb-e-azīz

ek ukhḌe hue be-jān shajar kī sūrat

apnī ummīdoñ se katrātī hai ab merī hayāt

ik ḳhatāvār kī sharminda nazar kī sūrat

chhat ḳhushī kī hai na hai aas kī dīvār koī

dil mirā hai kisī ujḌe hue ghar kī sūrat

kitnī badlī huī lagtī hai hameñ ai 'zāhid'

ek hī shaḳhs ke jaane se nagar kī sūrat

chhat Tapakti hai kisi dida-e-tar ki surat

kash dekhe koi aa kar mere ghar ki surat

yas ki god mein lipTa hai mera qalb-e-aziz

ek ukhDe hue be-jaan shajar ki surat

apni ummidon se katraati hai ab meri hayat

ek KHatawar ki sharminda nazar ki surat

chhat KHushi ki hai na hai aas ki diwar koi

dil mera hai kisi ujDe hue ghar ki surat

kitni badli hui lagti hai hamein ai 'zahid'

ek hi shaKHs ke jaane se nagar ki surat