chheDe na gul ko mauj-e-nasim-e-sahar abhi

chheḌe na gul ko mauj-e-nasīm-e-sahar abhī

achchhe haiñ nok-e-ḳhār se tār-e-nazar abhī

raushan huā hai aaj shab-e-zindagī kā ġham

lillāh mat bujhāo charāġh-e-sahar abhī

āsūda-kām kyā ho mirā zauq-e-bandagī

paayā nahīñ jabīñ ne koī sang-e-dar abhī

insāniyat ke jauhar-e-yaktā ko kyā kahūñ

maqsūd zindagī kā hai tahsīl-e-zar abhī

āsūdgī-e-zīst kā imkāñ nahīñ hanūz

hai ḳhair se jidāl pe āmāda shar abhī

kis tarah vo suneñge shab-e-ġham kī kaifiyat

nā-āshnā-e-shām hai un kī sahar abhī

maiñ kajravī pe qāfila vāloñ ko kyā kahūñ

aaya nahīñ hai raah pe ḳhud rāhbar abhī

'nātiq' jamāl-e-dost nazar aa.e daf.atan

parda takallufāt kā uTh jaa.e gar abhī

chheDe na gul ko mauj-e-nasim-e-sahar abhi

achchhe hain nok-e-KHar se tar-e-nazar abhi

raushan hua hai aaj shab-e-zindagi ka gham

lillah mat bujhao charagh-e-sahar abhi

aasuda-kaam kya ho mera zauq-e-bandagi

paya nahin jabin ne koi sang-e-dar abhi

insaniyat ke jauhar-e-yakta ko kya kahun

maqsud zindagi ka hai tahsil-e-zar abhi

aasudgi-e-zist ka imkan nahin hanuz

hai KHair se jidal pe aamada shar abhi

kis tarah wo sunenge shab-e-gham ki kaifiyat

na-ashna-e-sham hai un ki sahar abhi

main kajrawi pe qafila walon ko kya kahun

aaya nahin hai rah pe KHud rahbar abhi

'natiq' jamal-e-dost nazar aae dafatan

parda takallufat ka uTh jae gar abhi