chhin kar koi sakun bas de gaya hai iztirab

chhīn kar koī sakūñ bas de gayā hai iztirāb

jaane kaise rabt kī ye ibtidā hai iztirāb

har ghaḌī mar kar guzāreñ saañs aTkī hī rahe

jiite jī marne ke jaisī hī sazā hai iztirāb

manziloñ ke bhī nishāñ mub.ham hī kartā jā.egā

bas musalsal ik safar hai rāsta hai iztirāb

khañDaroñ kī yā bayābāñ kī taraf le jaa.e jo

aisī bhaTkātī huī sī ik sadā hai iztirāb

shādmānī baaġh kī to ho ga.ī mismār sab

phuul titlī aur ġhunchoñ meñ bachā hai iztirāb

chāñd taare phuul ḳhushbū ye gumāñ the ishq meñ

ik khulā hāsil huā aur ik milā hai iztirāb

kaise kah duuñ is jahāñ meñ koī bhī merā nahīñ

ajnabī har shai hai chāhe āshnā hai iztirāb

chhin kar koi sakun bas de gaya hai iztirab

jaane kaise rabt ki ye ibtida hai iztirab

har ghaDi mar kar guzaren sans aTki hi rahe

jite ji marne ke jaisi hi saza hai iztirab

manzilon ke bhi nishan mubham hi karta jaega

bas musalsal ek safar hai rasta hai iztirab

khanDaron ki ya bayaban ki taraf le jae jo

aisi bhaTkati hui si ek sada hai iztirab

shadmani bagh ki to ho gai mismar sab

phul titli aur ghunchon mein bacha hai iztirab

chand tare phul KHushbu ye guman the ishq mein

ek khula hasil hua aur ek mila hai iztirab

kaise kah dun is jahan mein koi bhi mera nahin

ajnabi har shai hai chahe aashna hai iztirab