chhin kar mujhse meri aah-o-fughan tak le gaya

chhīn kar mujh se mirī āh-o-fuġhāñ tak le gayā

raqs sub.h-o-shām kā ashk-e-ravāñ tak le gayā

chand logoñ ne sharar-āgīñ kiyā gulzār ko

tund tūfāñ āshiyāñ-dar-āshiyāñ tak le gayā

fasl-e-dard-o-ġham lahū-bardār ye jaltī havā

irtiqā-e-dahr shāyad āsmāñ tak le gayā

naqsh-e-pā-e-hādsāt-o-maut kī ḳhushbū milī

ham-navā merā mujhe jis jis makāñ tak le gayā

jis bulandī par khaḌā huuñ vāpsī mumkin nahīñ

lamha-e-daurāñ zamīñ se āsmāñ tak le gayā

dasht-e-behad meñ use kaise bhalā manzil mile

reg kā jhoñkā nishān-e-kārvāñ tak le gayā

jism ai 'betāb' chaltī phirtī zinda laash hai

vaqt kā tūfāñ ḳhirad kī dhajjiyāñ tak le gayā

chhin kar mujh se meri aah-o-fughan tak le gaya

raqs subh-o-sham ka ashk-e-rawan tak le gaya

chand logon ne sharar-agin kiya gulzar ko

tund tufan aashiyan-dar-ashiyan tak le gaya

fasl-e-dard-o-gham lahu-bardar ye jalti hawa

irtiqa-e-dahr shayad aasman tak le gaya

naqsh-e-pa-e-hadsat-o-maut ki KHushbu mili

ham-nawa mera mujhe jis jis makan tak le gaya

jis bulandi par khaDa hun wapsi mumkin nahin

lamha-e-dauran zamin se aasman tak le gaya

dasht-e-behad mein use kaise bhala manzil mile

reg ka jhonka nishan-e-karwan tak le gaya

jism ai 'betab' chalti phirti zinda lash hai

waqt ka tufan KHirad ki dhajjiyan tak le gaya