chhiTke hain tirgi mein sitare kabhi kabhi

chhiTke haiñ tīrgī meñ sitāre kabhī kabhī

kaam aa ga.e haiñ ġham ke sharāre kabhī kabhī

tūfān ban ga.e haiñ kabhī mere vāste

maujoñ meñ mil ga.e haiñ kināre kabhī kabhī

apnoñ kī be-ruḳhī se taġhayyur ke ḳhauf se

begāne ban ga.e haiñ hamāre kabhī kabhī

ai dost tum se tark-e-ta'alluq ke bāvajūd

ḳhvāboñ meñ kho ga.e haiñ tumhāre kabhī kabhī

be-ḳhauf ham qazā kī hadoñ se guzar ga.e

kartī rahī hayāt ishāre kabhī kabhī

rote rahe haiñ yaas ke maare tamām raat

din is tarah bhī ham ne guzāre kabhī kabhī

tanhā-ravī kī ḳhair mohabbat meñ ai 'kañval'

Thukrā diye haiñ ham ne sahāre kabhī kabhī

chhiTke hain tirgi mein sitare kabhi kabhi

kaam aa gae hain gham ke sharare kabhi kabhi

tufan ban gae hain kabhi mere waste

maujon mein mil gae hain kinare kabhi kabhi

apnon ki be-ruKHi se taghayyur ke KHauf se

begane ban gae hain hamare kabhi kabhi

ai dost tum se tark-e-ta'alluq ke bawajud

KHwabon mein kho gae hain tumhaare kabhi kabhi

be-KHauf hum qaza ki hadon se guzar gae

karti rahi hayat ishaare kabhi kabhi

rote rahe hain yas ke mare tamam raat

din is tarah bhi hum ne guzare kabhi kabhi

tanha-rawi ki KHair mohabbat mein ai 'kanwal'

Thukra diye hain hum ne sahaare kabhi kabhi