chhoD ja sath magar meri dua tu le ja

chhoḌ jā saath magar merī duā tū le jā

apne raste ke liye merā ḳhudā tū le jā

maiñ ne maanā ki ḳhatā koī nahīñ tujh se huī

apnī nā-karda ḳhatāoñ kī sazā tū le jā

zaḳhm bharne meñ to ik umr guzar jaatī hai

ḳhvāb pal bhar meñ sameTe haiñ pata tū le jā

jis ke saa.e tale ham ḳhvāb bunā karte the

is yaqīñ hī kī ye sad-chāk ridā tū le jā

donoñ mil kar jinheñ gaate the tū un gītoñ se

merī āvāz na le apnī sadā tū le jā

mere hisse kā jo hai dard use pī lūñgā

apne hisse kā sukūñ apnī vafā tū le jā

apnā rishta thā falak aur zamīñ kā rishta

'zāhid' is meñ hai jo phailā vo ḳhalā tū le jā

chhoD ja sath magar meri dua tu le ja

apne raste ke liye mera KHuda tu le ja

main ne mana ki KHata koi nahin tujh se hui

apni na-karda KHataon ki saza tu le ja

zaKHm bharne mein to ek umr guzar jati hai

KHwab pal bhar mein sameTe hain pata tu le ja

jis ke sae tale hum KHwab buna karte the

is yaqin hi ki ye sad-chaak rida tu le ja

donon mil kar jinhen gate the tu un giton se

meri aawaz na le apni sada tu le ja

mere hisse ka jo hai dard use pi lunga

apne hisse ka sukun apni wafa tu le ja

apna rishta tha falak aur zamin ka rishta

'zahid' is mein hai jo phaila wo KHala tu le ja