chhoD kar behaal mujhko apne begane gae

chhoḌ kar behāl mujh ko apne begāne ga.e

gardish-e-ayyām meñ sab log pahchāne ga.e

jaane kis kī bad-nazar ne hashr barpā kar diyā

mūnis-o-ġham-ḳhvār sab dushman meñ gardāne ga.e

koī bhī tadbīr apnī kaam ab aatī nahīñ

merī aql-o-faham ke mash.hūr afsāne ga.e

bhuuk aur iflās kī suulī chaḌhā kar qaum ko

rahnumā-e-vaqt ab parcham ko lahrāne ga.e

khīñch kar aksar garebāñ zarf ne rokā hameñ

jab kisī kamzor par ham zor dikhlāne ga.e

hosh vaalo ko ḳhirad-mandī ne buzdil kar diyā

aur mushkil ma.arkoñ par sirf dīvāne ga.e

kis meñ dekhūñ aks sachchā.ī kā ab maiñ kyā karūñ

aa.ine bhī jhuuT ke zumre meñ gardāne ga.e

mil gayā 'maqsūd' mujh ko ho ga.ī taaza ġhazal

fikr ke parde meñ jab alfāz lahrāne ga.e

chhoD kar behaal mujh ko apne begane gae

gardish-e-ayyam mein sab log pahchane gae

jaane kis ki bad-nazar ne hashr barpa kar diya

munis-o-gham-KHwar sab dushman mein gardane gae

koi bhi tadbir apni kaam ab aati nahin

meri aql-o-faham ke mashhur afsane gae

bhuk aur iflas ki suli chaDha kar qaum ko

rahnuma-e-waqt ab parcham ko lahrane gae

khinch kar aksar gareban zarf ne roka hamein

jab kisi kamzor par hum zor dikhlane gae

hosh walo ko KHirad-mandi ne buzdil kar diya

aur mushkil markon par sirf diwane gae

kis mein dekhun aks sachchai ka ab main kya karun

aaine bhi jhuT ke zumre mein gardane gae

mil gaya 'maqsud' mujh ko ho gai taza ghazal

fikr ke parde mein jab alfaz lahrane gae