chhoD kar dasht-e-junun mere nagar mein aaya

chhoḌ kar dasht-e-junūñ mere nagar meñ aayā

qais sadqe tire ustād ke ghar meñ aayā

kyā tirā hijr mirī rāhguzar meñ aayā

dard uTh uTh ke batātā hai jigar meñ aayā

apne ġham ko na mire dil se kahīñ jaane de

baḌī muddat se ye mehmān hai ghar meñ aayā

us ne bas itnā kahā aa mire siine se lag

phir to jis tarh mirā haath kamar meñ aayā

laakh bachtā huuñ magar us se bachā jaatā nahīñ

dard kahtā hai tirā le maiñ jigar meñ aayā

lazzat-e-ġham tire sadqe ki sivā ġham ke liye

dūsrā ek jigar mere jigar meñ aayā

mere marne kā bhī sunte nahīñ vo kahte haiñ

kaun kambaḳht hai ye kaise ḳhabar meñ aayā

aur suno jalte haiñ jannat meñ bhī vo hūroñ se

DhūñDte phirte haiñ bal kis kī kamar meñ aayā

bā-ḳhudā tujh ko suḳhan hī se ḳhudā kar dūñgā

mo'jiza ye bhī agar mere hunar meñ aayā

chhoD kar dasht-e-junun mere nagar mein aaya

qais sadqe tere ustad ke ghar mein aaya

kya tera hijr meri rahguzar mein aaya

dard uTh uTh ke batata hai jigar mein aaya

apne gham ko na mere dil se kahin jaane de

baDi muddat se ye mehman hai ghar mein aaya

us ne bas itna kaha aa mere sine se lag

phir to jis tarh mera hath kamar mein aaya

lakh bachta hun magar us se bacha jata nahin

dard kahta hai tera le main jigar mein aaya

lazzat-e-gham tere sadqe ki siwa gham ke liye

dusra ek jigar mere jigar mein aaya

mere marne ka bhi sunte nahin wo kahte hain

kaun kambaKHt hai ye kaise KHabar mein aaya

aur suno jalte hain jannat mein bhi wo huron se

DhunDte phirte hain bal kis ki kamar mein aaya

ba-KHuda tujh ko suKHan hi se KHuda kar dunga

mo'jiza ye bhi agar mere hunar mein aaya