chhoTe se gharondon se kabhi ghar nahin bante

chhoTe se gharoñdoñ se kabhī ghar nahīñ bante

kuchh os kī būñdoñ se samundar nahīñ bante

is soch ko tahrīr ke phūloñ se sajā deñ

lafzoñ kī sajāvaT se suḳhanvar nahīñ bante

yādoñ kī tijorī meñ jo mahfūz nahīñ haiñ

vo kuchh bhī baneñ pyaar ke zevar nahīñ bante

ham tum se mileñge bhī to ḳhāmosh raheñge

ik-tarfa savālāt se manzar nahīñ bante

ḳhush-fahmī kī dīvār girā dījiye ab to

chādar ke binā kaise bhī bistar nahīñ bante

be-kār usūloñ kī qavā.ed meñ phañse haiñ

bandish meñ to insān bhī behtar nahīñ bante

chhoTe se gharondon se kabhi ghar nahin bante

kuchh os ki bundon se samundar nahin bante

is soch ko tahrir ke phulon se saja den

lafzon ki sajawaT se suKHanwar nahin bante

yaadon ki tijori mein jo mahfuz nahin hain

wo kuchh bhi banen pyar ke zewar nahin bante

hum tum se milenge bhi to KHamosh rahenge

ik-tarfa sawalat se manzar nahin bante

KHush-fahmi ki diwar gira dijiye ab to

chadar ke bina kaise bhi bistar nahin bante

be-kar usulon ki qawaed mein phanse hain

bandish mein to insan bhi behtar nahin bante