chhoTi chhoTi baaton mein aankhen bhar aati hain

chhoTī chhoTī bātoñ meñ āñkheñ bhar aatī haiñ

yā to ham thoḌe pāgal haiñ yā jazbātī haiñ

sachchā jhūTā nek aur bad haiñ mire ta.āruf sab

ek hī jism meñ kitnī rūheñ gasht lagātī haiñ

sunā hai us tālāb kā paanī baḌā nashīlā hai

sunā hai us meñ pariyāñ aa kar roz nahātī haiñ

kuchh to dard diye haiñ mujh ko duniyā vāloñ ne

lekin kuchh aise ġham haiñ jo mere zaatī haiñ

is bartan kā mailā paanī amrit jaisā hai

is meñ nannhī chiḌiyāñ apnī pyaas bujhātī haiñ

aa pahuñchā huuñ tanhā.ī ke aise jangal meñ

jis meñ ḳhud apnī āvāzeñ lauT ke aatī haiñ

chīḳhtī rahtī haiñ ḳhāmoshī mere hoñToñ par

jis tarah sāhil par lahreñ shor machātī haiñ

shahr meñ aa kar bhī ham apnī miTTī kab bhūle

faḳhr hameñ hai ai 'ḳhālid' ke ham dehātī haiñ

chhoTi chhoTi baaton mein aankhen bhar aati hain

ya to hum thoDe pagal hain ya jazbaati hain

sachcha jhuTa nek aur bad hain mere taaruf sab

ek hi jism mein kitni ruhen gasht lagati hain

suna hai us talab ka pani baDa nashila hai

suna hai us mein pariyan aa kar roz nahati hain

kuchh to dard diye hain mujh ko duniya walon ne

lekin kuchh aise gham hain jo mere zati hain

is bartan ka maila pani amrit jaisa hai

is mein nannhi chiDiyan apni pyas bujhati hain

aa pahuncha hun tanhai ke aise jangal mein

jis mein KHud apni aawazen lauT ke aati hain

chiKHti rahti hain KHamoshi mere honTon par

jis tarah sahil par lahren shor machati hain

shahr mein aa kar bhi hum apni miTTi kab bhule

faKHr hamein hai ai 'KHalid' ke hum dehati hain