chhupa hua tha magar aashkar hona paDa

chhupā huā thā magar āshkār honā paḌā

ye jang jiit ke mujh ko farār honā paḌā

savārī koī mayassar thī kab safar ke liye

so apne sar pe hī mujh ko savār honā paḌā

ye sochtā huuñ kahīñ is kī vaj.h maiñ to nahīñ

ye dar-ba-dar jo mujhe baar baar honā paḌā

shadīd choT se āñkheñ phaTī rahīñ merī

isī liye mujhe zinda shumār honā paḌā

vo ik ḳhushī jo akelī bhaTaktī phir rahī thī

ġhamoñ ke saath use ham-kanār honā paḌā

ye des bhī mujhe pardes kī tarah milā hai

mujhe vatan meñ ġharīb-ud-dayār honā paḌā

kiyā hai andhā tire din kī raushnī ne mujhe

mire vajūd ko andar se ġhaar honā paḌā

ye umr kam thī tirī raah dekhne ke liye

isī liye to hameñ sharmsār honā paḌā

us aa.ine ne mujhe aks meñ chhupā liyā thā

so aa.ine ke mujhe ār-pār honā paḌā

jab is qatār ke agle sire pe pohñch gayā

mujhe qatār se phir be-qatār honā paḌā

chhupa hua tha magar aashkar hona paDa

ye jang jit ke mujh ko farar hona paDa

sawari koi mayassar thi kab safar ke liye

so apne sar pe hi mujh ko sawar hona paDa

ye sochta hun kahin is ki wajh main to nahin

ye dar-ba-dar jo mujhe bar bar hona paDa

shadid choT se aankhen phaTi rahin meri

isi liye mujhe zinda shumar hona paDa

wo ek KHushi jo akeli bhaTakti phir rahi thi

ghamon ke sath use ham-kanar hona paDa

ye des bhi mujhe pardes ki tarah mila hai

mujhe watan mein gharib-ud-dayar hona paDa

kiya hai andha tere din ki raushni ne mujhe

mere wajud ko andar se ghaar hona paDa

ye umr kam thi teri rah dekhne ke liye

isi liye to hamein sharmsar hona paDa

us aaine ne mujhe aks mein chhupa liya tha

so aaine ke mujhe aar-par hona paDa

jab is qatar ke agle sire pe pohnch gaya

mujhe qatar se phir be-qatar hona paDa