chhupae kya koi dard-e-jigar ko

chhupā.e kyā koī dard-e-jigar ko

mohabbat rang detī hai nazar ko

tumhārā husn tum par kab khilā thā

duā.eñ do mere zauq-e-nazar ko

payām-e-ahl-e-dil kyā jaane koī

nazar vaale samajhte haiñ nazar ko

buland itnā to ho zauq-e-tamāshā

nigāh-e-husn ḳhud DhūñDe nazar ko

zarā ruk ruk ke har parda uThānā

kahīñ jalve na gum kar deñ nazar ko

salāmat inqilābāt-e-zamāna

na.ī rāheñ milīñ fikr-o-nazar ko

jahāñ hotī hai dil ko raah dil se

nazar pahchān letī hai nazar ko

nazar de to shu.ūr-e-dīd bhī de

nahīñ to kyā karūñ le kar nazar ko

tajallī ḳhud nazar bantī hai lekin

miTā kar etibārāt-e-nazar ko

unheñ dekhe mujassam diid ho kar

shu.ūr itnā kahāñ hai har nazar ko

ḳhayāl un kā jahāñ bhī 'shauq' aayā

nazar tai kar ga.ī hadd-e-nazar ko

chhupae kya koi dard-e-jigar ko

mohabbat rang deti hai nazar ko

tumhaara husn tum par kab khila tha

duaen do mere zauq-e-nazar ko

payam-e-ahl-e-dil kya jaane koi

nazar wale samajhte hain nazar ko

buland itna to ho zauq-e-tamasha

nigah-e-husn KHud DhunDe nazar ko

zara ruk ruk ke har parda uThana

kahin jalwe na gum kar den nazar ko

salamat inqilabaat-e-zamana

nai rahen milin fikr-o-nazar ko

jahan hoti hai dil ko rah dil se

nazar pahchan leti hai nazar ko

nazar de to shuur-e-did bhi de

nahin to kya karun le kar nazar ko

tajalli KHud nazar banti hai lekin

miTa kar etibaraat-e-nazar ko

unhen dekhe mujassam did ho kar

shuur itna kahan hai har nazar ko

KHayal un ka jahan bhi 'shauq' aaya

nazar tai kar gai hadd-e-nazar ko