chhupne ke liye to meri aankhen hi bahut hain

chhupne ke liye to merī āñkheñ hī bahut haiñ

manzūr-e-nazar sab ke hoñ chāheñ bhī bahut haiñ

sirf apne liye jiine ko jiinā nahīñ kahte

is raah meñ rishtoñ kī sarā.eñ bhī bahut haiñ

TuuTe hue va.adoñ kī surañgoñ meñ gharoñ ko

jalte hue zaḳhmoñ kī shuā.eñ bhī bahut haiñ

har shai pe lagī hai yahāñ nīlām kī bolī

barbādī-e-aḳhlāq kī rāheñ bhī bahut haiñ

haiñ zulm ke patthar mire raste meñ añdhere

Takrā.eñ jo aapas meñ to kirneñ bhī bahut haiñ

jhūToñ ko Darāte haiñ unhīñ ke dar-o-dīvār

haq par haiñ agar ham to panāheñ bhī bahut haiñ

bachpan meñ machal paḌnā bhī ik haq thā hamārā

ab aise machalne kī sazā.eñ bhī bahut haiñ

āzādī-e-bāzār meñ raunaq hai ġhazab kī

lekin yahāñ māsūmoñ kī chīḳheñ bhī bahut haiñ

aise bhī shanāsāoñ meñ haiñ chor ki jin ke

roze bhī bahut aur namāzeñ bhī bahut haiñ

chhupne ke liye to meri aankhen hi bahut hain

manzur-e-nazar sab ke hon chahen bhi bahut hain

sirf apne liye jine ko jina nahin kahte

is rah mein rishton ki saraen bhi bahut hain

TuTe hue wadon ki surangon mein gharon ko

jalte hue zaKHmon ki shuaen bhi bahut hain

har shai pe lagi hai yahan nilam ki boli

barbaadi-e-aKHlaq ki rahen bhi bahut hain

hain zulm ke patthar mere raste mein andhere

Takraen jo aapas mein to kirnen bhi bahut hain

jhuTon ko Daraate hain unhin ke dar-o-diwar

haq par hain agar hum to panahen bhi bahut hain

bachpan mein machal paDna bhi ek haq tha hamara

ab aise machalne ki sazaen bhi bahut hain

aazadi-e-bazar mein raunaq hai ghazab ki

lekin yahan masumon ki chiKHen bhi bahut hain

aise bhi shanasaon mein hain chor ki jin ke

roze bhi bahut aur namazen bhi bahut hain