chhupne wale ye bhi chhupne ka koi andaz hai

chhupne vaale ye bhī chhupne kā koī andāz hai

tū hai parde meñ magar bāhar tirī āvāz hai

haa.e kyā bāñkī adā hai kyā ḳhirām-e-nāz hai

chaal ḳhanjar kī urūs-e-teġh kā andāz hai

ishq meñ kāmil huuñ maiñ vo husn meñ mumtāz hai

maiñ sarāpā-dard huuñ qātil sarāpā-nāz hai

ḳhair ho yā-rab mohabbat kā abhī āġhāz hai

rang-e-ruḳh merā abhī se mā.il-e-parvāz hai

bijliyoñ meñ ghir gayā hai dil ilāhī ḳhair ho

shoḳhiyāñ aafat haiñ qahr us par nigāh-e-nāz hai

tum ga.e gul-gasht ko rusvā.iyoñ ke gul khile

ham na kahte the zamāne kī havā nā-sāz hai

ye to kahiye jaan bhī dil bhī jigar bhī le chuke

ab ye kis kī taak meñ chashm-e-fusūñ-pardāz hai

ek vo jallād hai bulbul hai jis kī qaid meñ

dūsrā jallād us kī hasrat-e-parvāz hai

shukr kī jā he ki terā husn merā ishq aaj

qābil-e-sad-āfrīñ hai māya-e-sad-nāz hai

chārasāzoñ meñ ḳhudā rakkhe yahī ab rah ga.e

aah hai hamdam mirī dard-e-jigar dam-sāz hai

dost ban ban ke mire dushman banāte haiñ mujhe

ye zamāna bhī magar kitnā zamāna-sāz hai

donoñ apne fan meñ kāmil haiñ magar itnā hai farq

mujh ko hai mashq-e-vafā qātil ko ishq-e-nāz hai

dil meñ zālim ke hai go merī mohabbat kā asar

muñh se kah saktā nahīñ ye ik sitam kā raaz hai

ḳhosha-chīñ us kā huuñ 'safdar' jis ko kahte haiñ 'jalīl'

sāmne ḳhāmosh jis ke bulbul-e-shīrāz hai

chhupne wale ye bhi chhupne ka koi andaz hai

tu hai parde mein magar bahar teri aawaz hai

hae kya banki ada hai kya KHiram-e-naz hai

chaal KHanjar ki urus-e-tegh ka andaz hai

ishq mein kaamil hun main wo husn mein mumtaz hai

main sarapa-dard hun qatil sarapa-naz hai

KHair ho ya-rab mohabbat ka abhi aaghaz hai

rang-e-ruKH mera abhi se mail-e-parwaz hai

bijliyon mein ghir gaya hai dil ilahi KHair ho

shoKHiyan aafat hain qahr us par nigah-e-naz hai

tum gae gul-gasht ko ruswaiyon ke gul khile

hum na kahte the zamane ki hawa na-saz hai

ye to kahiye jaan bhi dil bhi jigar bhi le chuke

ab ye kis ki tak mein chashm-e-fusun-pardaz hai

ek wo jallad hai bulbul hai jis ki qaid mein

dusra jallad us ki hasrat-e-parwaz hai

shukr ki ja he ki tera husn mera ishq aaj

qabil-e-sad-afrin hai maya-e-sad-naz hai

chaarasazon mein KHuda rakkhe yahi ab rah gae

aah hai hamdam meri dard-e-jigar dam-saz hai

dost ban ban ke mere dushman banate hain mujhe

ye zamana bhi magar kitna zamana-saz hai

donon apne fan mein kaamil hain magar itna hai farq

mujh ko hai mashq-e-wafa qatil ko ishq-e-naz hai

dil mein zalim ke hai go meri mohabbat ka asar

munh se kah sakta nahin ye ek sitam ka raaz hai

KHosha-chin us ka hun 'safdar' jis ko kahte hain 'jalil'

samne KHamosh jis ke bulbul-e-shiraaz hai