chhuT gain nabzen ruki sansen nazar pathra gai

chhuT ga.iiñ nabzeñ rukī sāñseñ nazar pathrā ga.ī

maut kyuuñ kahiye use bīmār ko niiñd aa ga.ī

dar-haqīqat aap the yā aap kā aks-e-jamīl

vāqa.ī merī nazar kyā aaj dhokā khā ga.ī

maiñ ne chāhā thā ki phūloñ se basā luuñ pairahan

bū-e-gul bhī mere dāman se magar katrā ga.ī

ham ko tark-e-ārzū kā aaj ye hāsil milā

aarzū kā naam le kar aarzū sharmā ga.ī

baj uThā sāz-e-tarab aur jal uThe dil ke charāġh

ittifāqan bhī agar un se nazar Takrā ga.ī

ban ga.ī vaj.h-e-faroġh-e-anjuman sham-e-hayāt

zindagī thī aap kī aur aap ke kaam aa ga.ī

us nigāh-e-multafit kā mujh se phirnā thā 'jalīl'

ārzūoñ ke gulistāñ meñ ḳhizāñ sī chhā ga.ī

chhuT gain nabzen ruki sansen nazar pathra gai

maut kyun kahiye use bimar ko nind aa gai

dar-haqiqat aap the ya aap ka aks-e-jamil

waqai meri nazar kya aaj dhoka kha gai

main ne chaha tha ki phulon se basa lun pairahan

bu-e-gul bhi mere daman se magar katra gai

hum ko tark-e-arzu ka aaj ye hasil mila

aarzu ka nam le kar aarzu sharma gai

baj uTha saz-e-tarab aur jal uThe dil ke charagh

ittifaqan bhi agar un se nazar Takra gai

ban gai wajh-e-farogh-e-anjuman sham-e-hayat

zindagi thi aap ki aur aap ke kaam aa gai

us nigah-e-multafit ka mujh se phirna tha 'jalil'

aarzuon ke gulistan mein KHizan si chha gai