chhu kar hawa pata tere ashkon ka de gai

chhū kar havā patā tire ashkoñ kā de ga.ī

dil kā qarār chain nigāhoñ kā le ga.ī

be-ḳhvāb merī niiñd ki jis tarah shab Dhale

ik sham.a dil kā dard akele sahe ga.ī

mauzūñ huā na koī bhī dil meñ ḳhayāl-e-shauq

dil meñ jo aarzū kī chitā thī jale ga.ī

sāhil pe jis qadar bhī gharauñde the bah ga.e

dīvār jo vafāoñ kī zāmin thī Dhe ga.ī

manzar badal badal ke mujhe de gayā sarāb

dil kā yaqīn qīmtī shai thī vo shai ga.ī

tāsīr ġham bhulāne kī kho dī sharāb ne

joñ hī hamāre haath se chhū kar ye mai ga.ī

chhu kar hawa pata tere ashkon ka de gai

dil ka qarar chain nigahon ka le gai

be-KHwab meri nind ki jis tarah shab Dhale

ek shama dil ka dard akele sahe gai

mauzun hua na koi bhi dil mein KHayal-e-shauq

dil mein jo aarzu ki chita thi jale gai

sahil pe jis qadar bhi gharaunde the bah gae

diwar jo wafaon ki zamin thi Dhe gai

manzar badal badal ke mujhe de gaya sarab

dil ka yaqin qimti shai thi wo shai gai

tasir gham bhulane ki kho di sharab ne

jon hi hamare hath se chhu kar ye mai gai