chhu ke kya zulf-e-pareshan ko saba aai hai

chhū ke kyā zulf-e-pareshāñ ko sabā aa.ī hai

aaj dīvāne ne jiine kī qasam khaa.ī hai

mahfil-e-nāz meñ har ik se shanāsā.ī hai

phir bhī har gaam pe andesha-e-rusvā.ī hai

kuchh ḳhabar bhī hai urūs-e-ġham-e-daurāñ tujh ko

kaun sī baat hameñ raah pe le aa.ī hai

itnī pur-pech hai ai jān-e-jahāñ rāh-e-hayāt

terī zulfoñ kī har ik gaam pe yaad aa.ī hai

jhāñktā rahtā hai ḳhvāboñ ke darīche se koī

kitnī pur-kaif hamārī shab-e-tanhā.ī hai

kyā tire chāhne vāloñ meñ hai us kā bhī shumār

jo na dīvāna hai majnūñ hai na saudā.ī hai

sochtā huuñ ki na guzre kahīñ kuchh un pe girāñ

aaj phir sāz-e-shikasta pe ġhazal gaa.ī hai

chhu ke kya zulf-e-pareshan ko saba aai hai

aaj diwane ne jine ki qasam khai hai

mahfil-e-naz mein har ek se shanasai hai

phir bhi har gam pe andesha-e-ruswai hai

kuchh KHabar bhi hai urus-e-gham-e-dauran tujh ko

kaun si baat hamein rah pe le aai hai

itni pur-pech hai ai jaan-e-jahan rah-e-hayat

teri zulfon ki har ek gam pe yaad aai hai

jhankta rahta hai KHwabon ke dariche se koi

kitni pur-kaif hamari shab-e-tanhai hai

kya tere chahne walon mein hai us ka bhi shumar

jo na diwana hai majnun hai na saudai hai

sochta hun ki na guzre kahin kuchh un pe giran

aaj phir saz-e-shikasta pe ghazal gai hai