chhuT jata hai ek jahan humse

chhūT jaatā hai ik jahāñ ham se

suniye us ghar kī dāstāñ ham se

taarā laTkā huā thā Tahnī par

chhīn letā na āsmāñ ham se

rāsta phūñk phūñk chalte haiñ

aur havā kā hai bādbāñ ham se

girte patte shumār karte haiñ

kyoñ na kuchh aur imtihāñ ham se

un ke saa.e meñ kāTte haiñ unheñ

bhāgte haiñ shajar kahāñ ham se

jān-e-jānāñ hai jaañ hai nas nas meñ

duur ho jā balā-e-jāñ ham se

apne saa.e meñ hai vajūd apnā

aur milte haiñ ham kahāñ ham se

phuul urdu ke khilte haiñ 'nāzir'

chhīn le kaun ye zabāñ ham se

chhuT jata hai ek jahan hum se

suniye us ghar ki dastan hum se

tara laTka hua tha Tahni par

chhin leta na aasman hum se

rasta phunk phunk chalte hain

aur hawa ka hai baadban hum se

girte patte shumar karte hain

kyon na kuchh aur imtihan hum se

un ke sae mein kaTte hain unhen

bhagte hain shajar kahan hum se

jaan-e-jaanan hai jaan hai nas nas mein

dur ho ja bala-e-jaan hum se

apne sae mein hai wajud apna

aur milte hain hum kahan hum se

phul urdu ke khilte hain 'nazir'

chhin le kaun ye zaban hum se