chimniyon ke dhuen se aTa canwas aise dhundla gaya

chimniyoñ ke dhueñ se aTā canvas aise dhuñdlā gayā

pāniyoñ par falak se utartā huā chāñd pathrā gayā

vahshatoñ ke pharere ubharne lage saañs ghuTne lagā

ḳhvāb kā devtā naḳhvat-e-kām-gārī meñ saThiyā gayā

dekhte dekhte lahlahāte hue khet zahrā ga.e

factory se nikaltā huā azhdahā gaañv tak aa gayā

sat.h-e-tālāb pe kab numūdār ho dekhiye jal-parī

chāñd jis kī mohabbat meñ Duubā huā jhiil tak aa gayā

merā siina dafīna hai us naujavāñ kā jo chillātā thā

gaañv vaalo baḌho gaañv vaalo baḌho aaj sher aa gayā

apnī ThāTheñ sañbhālo mirī tishnagī ko baḌhāvā na do

dil agar is taraf ik zarā bhī phirā to ye dariyā gayā

chimniyon ke dhuen se aTa canwas aise dhundla gaya

paniyon par falak se utarta hua chand pathra gaya

wahshaton ke pharere ubharne lage sans ghuTne laga

KHwab ka dewta naKHwat-e-kaam-gari mein saThiya gaya

dekhte dekhte lahlahate hue khet zahra gae

factory se nikalta hua azhdaha ganw tak aa gaya

sath-e-talab pe kab numudar ho dekhiye jal-pari

chand jis ki mohabbat mein Duba hua jhil tak aa gaya

mera sina dafina hai us naujawan ka jo chillata tha

ganw walo baDho ganw walo baDho aaj sher aa gaya

apni ThaThen sanbhaalo meri tishnagi ko baDhawa na do

dil agar is taraf ek zara bhi phira to ye dariya gaya