chitwan mein shararat hai aur scene bhi chanchal hai

chitvan meñ sharārat hai aur scene bhī chanchal hai

kāfir tirī nazroñ meñ kuchh aur hī chhal-bal hai

baalā bhī chamaktā hai jugnū bhī damaktā hai

baddhī kī lipaT tis par tā'vīz kī haikal hai

gorā vo galā nāzuk aur peT milā.ī sā

siine kī safā.ī bhī aisī goyā maḳhmal hai

vo husn ke gulshan meñ maġhrūr na ho kyūñ-kar

baḌhtī huī Daalī hai uThtī huī koñpal hai

añgiyā vo ġhazab jis ko malmal hī kare dil bhī

kyā jaane ki shabnam hai nansukh hai ki malmal hai

ye do jo na.e phal haiñ siine pe tire zālim

Tuk haath lagāne de jiine kā yahī phal hai

ubhrā huā vo siina aur josh bharā joban

ek naaz kā dariyā hai ik husn kā bādal hai

kyā kiije bayāñ yaaro chanchal kī rukhāvaT kā

har baat meñ dur dur hai har aan meñ chal-chal hai

ye vaqt hai ḳhalvat kā ai jaan na kar kal kal

kāfir tirī kal kal se ab jī mirā bekal hai

kal maiñ ne kahā us se kyā dil meñ ye aayā jo

kañghī hai na choTī hai missī hai na kājal hai

mā'lūm huā ham se rūThe ho tum ai jaanī

ulTā hī dupaTTe kā mukhḌe pe ye āñchal hai

ye sun ke lagī kahne rūThī to nahīñ tujh se

par kyā kahūñ do din se kuchh dil mirā bekal hai

jis din hī 'nazīr' aa kar vo shoḳh mile ham se

hath-pher haiñ bose haiñ din raat kī mal-dal hai

chitwan mein shararat hai aur scene bhi chanchal hai

kafir teri nazron mein kuchh aur hi chhal-bal hai

baala bhi chamakta hai jugnu bhi damakta hai

baddhi ki lipaT tis par ta'wiz ki haikal hai

gora wo gala nazuk aur peT milai sa

sine ki safai bhi aisi goya maKHmal hai

wo husn ke gulshan mein maghrur na ho kyun-kar

baDhti hui Dali hai uThti hui konpal hai

angiya wo ghazab jis ko malmal hi kare dil bhi

kya jaane ki shabnam hai nansukh hai ki malmal hai

ye do jo nae phal hain sine pe tere zalim

Tuk hath lagane de jine ka yahi phal hai

ubhra hua wo sina aur josh bhara joban

ek naz ka dariya hai ek husn ka baadal hai

kya kije bayan yaro chanchal ki rukhawaT ka

har baat mein dur dur hai har aan mein chal-chal hai

ye waqt hai KHalwat ka ai jaan na kar kal kal

kafir teri kal kal se ab ji mera bekal hai

kal main ne kaha us se kya dil mein ye aaya jo

kanghi hai na choTi hai missi hai na kajal hai

ma'lum hua hum se ruThe ho tum ai jaani

ulTa hi dupaTTe ka mukhDe pe ye aanchal hai

ye sun ke lagi kahne ruThi to nahin tujh se

par kya kahun do din se kuchh dil mera bekal hai

jis din hi 'nazir' aa kar wo shoKH mile hum se

hath-pher hain bose hain din raat ki mal-dal hai