choT par choT kha raha hun main

choT par choT khā rahā huuñ maiñ

ādatan muskurā rahā huuñ maiñ

us ke uupar to kuchh asar hī nahīñ

apnā dil kyoñ jalā rahā huuñ maiñ

aaj tanhā.ī meñ jo baiThe ho

kyā tumheñ yaad aa rahā huuñ maiñ

kaun aa.egā mujh se milne ko

apnā ghar kyoñ sajā rahā huuñ maiñ

aaj jī bhar ke dekh lo mujh ko

ab bahut duur jā rahā huuñ maiñ

kyā tumheñ ab bhī kuchh shikāyat hai

ab to sab kuchh kamā rahā huuñ maiñ

haath meñ degrēyāñ sajā.e hue

Thokareñ kitnī khā rahā huuñ maiñ

ab mujhe peT in se bharnā hai

ye jo ḳhanjar banā rahā huuñ maiñ

kal koī is ko bhī na chhoḌegā

ye jo paudā lagā rahā huuñ maiñ

choT par choT kha raha hun main

aadatan muskura raha hun main

us ke upar to kuchh asar hi nahin

apna dil kyon jala raha hun main

aaj tanhai mein jo baiThe ho

kya tumhein yaad aa raha hun main

kaun aaega mujh se milne ko

apna ghar kyon saja raha hun main

aaj ji bhar ke dekh lo mujh ko

ab bahut dur ja raha hun main

kya tumhein ab bhi kuchh shikayat hai

ab to sab kuchh kama raha hun main

hath mein degreeyan sajae hue

Thokaren kitni kha raha hun main

ab mujhe peT in se bharna hai

ye jo KHanjar bana raha hun main

kal koi is ko bhi na chhoDega

ye jo pauda laga raha hun main