chunne na diya ek mujhe lakh jhaDe phul

chunñe na diyā ek mujhe laakh jhaḌe phuul

allāh kare ḳhāna-e-gul-chīñ meñ paḌe phuul

ham-palla hue us se na chhoTe na baḌe phuul

āñkhoñ meñ tulā yaar tarāzū meñ paḌe phuul

jā jā ke bahut zulf ke kūche meñ aḌe phuul

lekin na kabhī kaan ke patte se laḌe phuul

vo murġh-e-chaman haiñ ki bahār apnī ḳhizāñ hai

kaliyā.e par-o-bāl jab apne to jhaḌe phuul

kuchh bhī hai jinheñ azm vahī sadr-nashīñ haiñ

hote haiñ gul-rū-e-sabad sab se baḌe phuul

sarsoñ bhī nahīñ phūltī āñkhoñ meñ hamārī

jab tak ki chaḌhā jaa.eñ na do-chār ghaḌe phuul

raushan-suḳhanī ḳhatm hai us ġhuncha-dahan par

hath-phūl ke muñh se kabhī aise na jhaḌe phuul

taqdīr meñ zillat thī gul-rū-e-sanam se

thāloñ ne bahut gor jhañkā.e na gaḌe phuul

rāñgā ho agar dast-baranjan to hai chāñdī

vo gul jo na pahne to haiñ sone ke kaḌe phuul

fariyād kar us dard se ai murġh-e-gulistāñ

kāñTe kī sināñ bāñdh ke gulchīñ se laḌe phuul

kis din na khiñche āh-e-sharar-bār kī talvār

kasarāt na maiñ ne sipar-e-mah meñ jaḌe phuul

kyā jurm hai kis bulbul-e-shaidā ko jalāyā

kyuuñ chār-pahar dhuup meñ hote haiñ khaḌe phuul

kyā sabza-e-ruḳhsār se nisbat hai chaman ko

kāñTe ye vo haiñ jin kī haiñ palle meñ dhaḌe phuul

ham zaḳhmiyoñ ko chāñdnī kī taab nahīñ hai

sahte haiñ kaḌī dhuup nihāyat haiñ kaḌe phuul

dāġhoñ ke hī qābil the ham is baaġh meñ ai 'bahr'

gulchīn-e-muqaddar ne diye haiñ ye saḌe phuul

chunne na diya ek mujhe lakh jhaDe phul

allah kare KHana-e-gul-chin mein paDe phul

ham-palla hue us se na chhoTe na baDe phul

aankhon mein tula yar taraazu mein paDe phul

ja ja ke bahut zulf ke kuche mein aDe phul

lekin na kabhi kan ke patte se laDe phul

wo murgh-e-chaman hain ki bahaar apni KHizan hai

kaliyae par-o-baal jab apne to jhaDe phul

kuchh bhi hai jinhen azm wahi sadr-nashin hain

hote hain gul-ru-e-sabad sab se baDe phul

sarson bhi nahin phulti aankhon mein hamari

jab tak ki chaDha jaen na do-chaar ghaDe phul

raushan-suKHani KHatm hai us ghuncha-dahan par

hath-phul ke munh se kabhi aise na jhaDe phul

taqdir mein zillat thi gul-ru-e-sanam se

thaalon ne bahut gor jhankae na gaDe phul

ranga ho agar dast-baranjan to hai chandi

wo gul jo na pahne to hain sone ke kaDe phul

fariyaad kar us dard se ai murgh-e-gulistan

kanTe ki sinan bandh ke gulchin se laDe phul

kis din na khinche aah-e-sharar-bar ki talwar

kasaraat na main ne sipar-e-mah mein jaDe phul

kya jurm hai kis bulbul-e-shaida ko jalaya

kyun chaar-pahar dhup mein hote hain khaDe phul

kya sabza-e-ruKHsar se nisbat hai chaman ko

kanTe ye wo hain jin ki hain palle mein dhaDe phul

hum zaKHmiyon ko chandni ki tab nahin hai

sahte hain kaDi dhup nihayat hain kaDe phul

daghon ke hi qabil the hum is bagh mein ai 'bahr'

gulchin-e-muqaddar ne diye hain ye saDe phul