chupke chupke kaun ye dil par karam farmae hai

chupke chupke kaun ye dil par karam farmā.e hai

dard se taskīn miltī hai sukūñ taḌpā.e hai

dushmanoñ se pūchh kar dekho to az-rāh-e-ḳhulūs

mere baare meñ mire ahbāb kī kyā raa.e hai

jaane kis 'ālam meñ haiñ ehsās kī majbūriyāñ

maiñ bhulātā huuñ jise aksar vahī yaad aa.e hai

ye matā'-e-be-badal sab ke muqaddar meñ kahāñ

ġham 'atā karne se pahle dil bhī dekhā jaa.e hai

chheḌ in tāroñ ko lekin haañ zarā āhista chheḌ

yād-e-jānāñ ab to dil kā saaz TuuTā jaa.e hai

mere dil kā haal koī pūchhne vaalā nahīñ

aur merā dil ki ġhairoñ ke bhī ġham apnā.e hai

maiñ ne dekhā hai vo 'ālam bhī nigāh-e-shauq kā

jab tirī tasvīr meñ bhī jaan sī paḌ jaa.e hai

jo mire dil par guzartī hai kisī ko kyā ḳhabar

dekhne vaalā mirī sūrat se dhokā khaa.e hai

'badr' har 'ālam meñ hai 'ālam vahī pesh-e-nazar

koī sūrat ho vahī sūrat nazar aa jaa.e hai

chupke chupke kaun ye dil par karam farmae hai

dard se taskin milti hai sukun taDpae hai

dushmanon se puchh kar dekho to az-rah-e-KHulus

mere bare mein mere ahbab ki kya rae hai

jaane kis 'alam mein hain ehsas ki majburiyan

main bhulata hun jise aksar wahi yaad aae hai

ye mata'-e-be-badal sab ke muqaddar mein kahan

gham 'ata karne se pahle dil bhi dekha jae hai

chheD in taron ko lekin han zara aahista chheD

yaad-e-jaanan ab to dil ka saz TuTa jae hai

mere dil ka haal koi puchhne wala nahin

aur mera dil ki ghairon ke bhi gham apnae hai

main ne dekha hai wo 'alam bhi nigah-e-shauq ka

jab teri taswir mein bhi jaan si paD jae hai

jo mere dil par guzarti hai kisi ko kya KHabar

dekhne wala meri surat se dhoka khae hai

'badr' har 'alam mein hai 'alam wahi pesh-e-nazar

koi surat ho wahi surat nazar aa jae hai