chupke se koi aaya tha aansu baha gaya

chupke se koī aayā thā aañsū bahā gayā

ik sham' mere naam kī aa kar jalā gayā

ab tak samajh meñ ye nahīñ aayā vo kaun thā

ujḌā huā thā ghar koī aa kar basā gayā

jalne lagī thī kab se mirī sham’-e-intizār

jhoñkā havā kā aayā thā aa kar chalā gayā

merā yahāñ pe aane kā vā'da na thā koī

phir kaun merī raah meñ āñkheñ bichhā gayā

hālāt kaise rang badalte haiñ dekhiye

jo laḌkhaḌā rahā thā vo manzil ko pā gayā

hālāt kyā haiñ shahr ke tum jāntī ho 'nāz'

ujḌe hue the ghar koī aa kar basā gayā

chupke se koi aaya tha aansu baha gaya

ek sham' mere nam ki aa kar jala gaya

ab tak samajh mein ye nahin aaya wo kaun tha

ujDa hua tha ghar koi aa kar basa gaya

jalne lagi thi kab se meri sham’-e-intizar

jhonka hawa ka aaya tha aa kar chala gaya

mera yahan pe aane ka wa'da na tha koi

phir kaun meri rah mein aankhen bichha gaya

haalat kaise rang badalte hain dekhiye

jo laDkhaDa raha tha wo manzil ko pa gaya

haalat kya hain shahr ke tum jaanti ho 'naz'

ujDe hue the ghar koi aa kar basa gaya