churae nazren kabhi muD ke dekhta bhi hai

churā.e nazreñ kabhī muḌ ke dekhtā bhī hai

ki tiir tirchhī nigāhoñ ke pheñktā bhī hai

ajiib shaḳhs hai likh kar phir apne dil kā varaq

na jaane kaun sī vahshat meñ moḌtā bhī hai

tum is pe chal ke mirī zaat meñ chale aao

ye pul-sirāt tumhāre liye khulā bhī hai

samajh ke soch ke aanā ki is mohabbat meñ

jahāñ sukūn hai is meñ to rat-jagā bhī hai

maiñ is haqīr ko āḳhir ye kaise samjhā.ūñ

faqat ḳhatā hī nahīñ ishq mo.ajiza bhī hai

maiñ jis ko maar ke zinda bhī rah nahīñ saktā

vahī zamīr hai merā vahī ḳhudā bhī hai

baḌe jatan se milā hijr-e-dā.imī mujh ko

yahī maraz hai mirā aur yahī davā bhī hai

bhale zamāne ne bhar dī hoñ talḳhiyāñ mujh meñ

mirī zabān pe urdu kā zā.iqa bhī hai

baḌe hī ġhaur se suntā hai saare sher magar

ġhalat kahan pe mujhe baḌh ke Toktā bhī hai

churae nazren kabhi muD ke dekhta bhi hai

ki tir tirchhi nigahon ke phenkta bhi hai

ajib shaKHs hai likh kar phir apne dil ka waraq

na jaane kaun si wahshat mein moDta bhi hai

tum is pe chal ke meri zat mein chale aao

ye pul-siraat tumhaare liye khula bhi hai

samajh ke soch ke aana ki is mohabbat mein

jahan sukun hai is mein to rat-jaga bhi hai

main is haqir ko aaKHir ye kaise samjhaun

faqat KHata hi nahin ishq moajiza bhi hai

main jis ko mar ke zinda bhi rah nahin sakta

wahi zamir hai mera wahi KHuda bhi hai

baDe jatan se mila hijr-e-daimi mujh ko

yahi maraz hai mera aur yahi dawa bhi hai

bhale zamane ne bhar di hon talKHiyan mujh mein

meri zaban pe urdu ka zaiqa bhi hai

baDe hi ghaur se sunta hai sare sher magar

ghalat kahan pe mujhe baDh ke Tokta bhi hai